ဘ၀အမောတွေ ..ဖြေသိမ့်လိုက်

နိုးတ၀က်အိမ်မက်နဲ့ ဘ၀ပျက်ည

ဘ၀က အိမ်မက်မက်သလို
မနေ့ကတစ်မျိုး ဒီနေ့တစ်မျိုးနဲ့
ရွှေရှိတယ် ငွေရှိတယ်
လုပ်ချင်တဲ့အရာအားလုံး
ဖြစ်ခဲ့ရ...
ပြည့်စုံတဲ့ဘ၀လို့ရယ်တောင်မှ
ထင်မှတ်မှားကာ အောင့်မေ့ခဲ့ရ။

ဟော...
ဒီနေ့ကြည့်စမ်း
ဘယ်ကစပြီး ဘာတွေကိုလုပ်လို့
ဘယ်အရာက စရမယ်ဆိုတာ
တွေးကြည့်ရင်းက ရင်လေးလှတယ်
ငါ့ဘ၀ရယ်...။

ပျော်ရွှင်မှုတွေ ဆိတ်သုန်း
အောင်မြင်မှုတွေ ကျရှုံး
ငါ့ခြေထောက်တွေ ရိုက်ချိုးခံရ
ဘ၀အစိတ်အပိုင်းတွေ အရစ်ပြုန်း
ကျိုးပြတ် ကျိုးမဲ့သွားတဲ့ ဂီတာတစ်လက်လို
ဒီသံစဉ်တွေ ဒီကာရံတွေ
ဆက်လက်ကွန့်မြူး တေးသံကြူးဖို့
လောလောဆယ်ဘ၀မယ်
မဖြစ်နိုင်တော့တယ် ...။

ဘ၀က အိမ်မက်လှလှ
တေးသွားချိုချိုတွေကို ခံစားရင်း
လွင့်မျောရင်း ကာရံတွေသီ
အချိန်တွေလည်း အလီလီ
ကုန်လွန်ကွယ်ပျောက် တမိုးသောက်တော့
အိမ်မက်တွေက နိုးထငါ့ဘ၀
ဘ၀ဆိုတာ ဒါလားလို့
ငါ ..အခုမှ ဂဃနဏ
သေချာခံစား နားလည်ထားလိုက်တယ် ...
အဲဒီ့အချိန်ကျမှ ငါ့ဝက
မလှမပ လဲပြိုကျနေပြီ
နိုးတစ်ဝက်အိမ်မက်မှာ
ဘ၀ပျက်နေခဲ့တာပါလား ...။

မျှော်လင့်ချက်တွေ ရင်မှာရှိနေသရွေ့တော့
မနက်ဖြန်ဆိုတဲ့ ဘ၀ရဲ့နေ့သစ်တွေ
သာယာစိုပြေနေဦးမယ် ထင်ပါရဲ့ ...
မနေ့ကဆိုတာ အိမ်မက်
မနက်ဖြန်ဆိုတာ မျှော်လင့်ချက်(အနာဂါတ်)
ဒီနေ့က လက်ရှိဘ၀
ဒီအချိန်မှာ ငါနိုးထကာ
ကြိုးစားရမှာပဲလေ ...။

အင်း ...
စုတ်ပြတ်ကြမ်းတမ်းလှတဲ့ဘ၀နဲ့
လောကဓံရဲ့ မုန်တိုင်းထန်ထန်မှာ
ပန်းတိုင်ဟာ ဘယ်လောက်ပဲ
မသဲမကွဲ ဝေးနေစမ်းပါစေဦးတော့
ငါတို့တွေ ဒီခရီးကိုကို အနိုင်ဖြတ်ကူးကြတာပေါ့ ...။

photo : google image

ဆက်ဖတ်ကြည့်မယ်......

ပြန်ခေါက်ပေးရန်....

အမေသို့ ... တမ်းချင်းများ

“ အမေသို့ ”

အမေ ...
စာမလာ သတင်းမကြား
အဝေးဆီမှာ ရောက်နေရတဲ့
သားတေလေကို ခွင့်လွှတ်ပါနော် ...။

အမေ...
လွမ်းရေးထက် ဝမ်းရေးခက်မို့
အမေ့ရင်ခွင် အေးရိမ်မြုံအောက်က
ပြေးထွက်ခဲ့တဲ့ ကျွန်တော့်ရဲ့
အဖြစ်အပျက်ကို မကြည့်ရက်မှန်း
သားသိပါတယ် အမေရယ် ...။

အမေ ...
သားမရှိတဲ့ နေရပ်ရွာမှာ
တိုင်းတပါးက သားအတွက်
ရတက်မအေး ပူးဆွေးသောကနဲ့
နေ့စဉ်ရက်ဆက် လွမ်းလျက်နေတာ
သားသိပါတယ် အမေရယ် ...။

အမေ ...
အမေတစ်ယောက်တည်း ရပ်တည်ဆဲပဲ
အမေ့အပါးမှာ ချစ်သားမရှိချိန်
နေကောင်းကျန်းမာ ရှိပါလေစ
ညစဉ်ညတိုင်း တွေးမိလေတိုင်း
သားလေ .. အိပ်ရေးမဝခဲ့ရဘူး ...။

အမေ ...
ရွှေပြည်တော်ကို ပြန်လာလိုလည်း
သားရည်မှန်းချက် တဝက်တပျက်
ခရီးဆက်ဆဲ ဘဝထဲမို့
ရွှေပြည်တော်ပြန် အိမ်မက်ခရီးက
မျှော်တိုင်းဝေးဆဲပါ အမေ ...။

အမေ ...
ရည်မှန်းချက်တွေ ပြည့်ဝ
အနာဂါတ်တွေ လှပတဲ့
တစ်နေ့နေ့တော့ ပြန်လာခဲ့မယ်နော် ...။

photo : google image.

ဆက်ဖတ်ကြည့်မယ်......

ပြန်ခေါက်ပေးရန်....

ရင်ထဲက အမှတ်တရ

တွေ့ဆုံပွဲကျင်းပပြုလုပ်ခဲ့ရာ ဆိုဂိုကုန်တိုက်အတွင်းရှိ နတ်ပြည်နန်းတော် မြန်မာစားသောက်ဆိုင်

ကျွန်တော် မထင်မှတ်ခဲ့တဲ့ မလေးရောက် ဘလော့ဂ်ဂါများ တွေ့ဆုံပွဲလေးတစ်ခု (၁၁-၁၀-၂၀၀၉)ရက်နေ့မှာ အောင်မြင်စွာ ပြီးစီးခဲ့ပါပြီ။ ကျွန်တော်တို့အားလုံး စိတ်ပင်ပမ်း၊ လူပင်ပမ်းကြီးစွာနဲ့ ဖြစ်နိုင်ချေနည်းလွန်းလှတဲ့ အခွင့်အရေးတစ်ခုအပေါ်မှာ မျှော်လင့်ချက်တွေထားပြီး အကောင်အထည်ဖော်ခဲ့တာ အခုဆိုရင် အဲဒီ့မျှော်လင့်ချက်တွေ အထမြောက်ခဲ့ပြီလေ။ ကျွန်တော့်ဘဝတစ်သက်တာမှာ ဒီလိုအဖြစ်အပျက်မျိုးဟာ ဘယ်တော့မှ မေ့ရနိုင်မှာ မဟုတ်တော့ပါဘူး။ ဒီပွဲလေး ပြီးမြောက်သွားသည့်တိုင် ရင်ထဲမှာ တငွေ့ငွေ့နဲ့အောင့်မေ့သတိရ လွမ်းဆွတ်နေဦးမှာပါ။ နောက်ထပ် ဒီလိုအခွင့်အရေးမျိုး ကြုံကြိုက်လာဖို့ကိုလည်း မျှော်လင့်နေဦးမှာပါ။ ဘဝမှာ သတိတရဖြစ်စေသော အဖြစ်အပျက်လေးများ၊ အမှတ်ရစရာလေးများထဲမှ အမှတ်တရ တစ်ခုဖြစ်မည်ဆိုလျှင်လည်း မမှားပါ။ ထိုအမှတ်တရတစ်ခုအတွက် ကြုံခဲ့ရတဲ့ အဖြစ်အပျက်လေးများကို တစိတ်တဒေသလောက်ပဲဖြစ်စေ မှတ်တမ်းတင်ထားရစ်ခဲ့ရပေမည်။

အဲဒီနေ့မတိုင်ခင်ကပေါ့... ကျွန်တော်တို့ ဒီပွဲဖြစ်မြောက်ဖို့အတွက် ဘယ်လောက် အပင်ပန်းခံခဲ့ရတယ်ဆိုတာ တချို့ရင်းနှီးသူများသာ သိခဲ့ကြတယ်။ ဘယ်နေရာမှာမဆို ဘာပဲလုပ်လုပ် အခက်အခဲ အကြပ်အတည်းတွေကတော့ တစ်ခုမဟုတ်တစ်ခု မလွဲမသွေ ရင်ဆိုင် ကြုံတွေ့ကြရမှာပဲ။ မလေးရှားဆိုတာက ကိုယ့်ရဲ့တိုင်းပြည်မဟုတ်သလို ကိုယ့်နိုင်ငံမှာလိုမျိုး နိုင်ငံသား လူ့အခွင့်အရေးတွေ ပြည့်ပြည့်ဝဝခံစားခွင့် ရှိတာမဟုတ်။ ဒီကြားထဲ ကိုယ်တွေက သူတပါးတိုင်းပြည်မှာ ရောက်ရှိနေတဲ့ နိုင်ငံခြားသား (လူမျိုးခြား)တွေပါ။ တကယ်တော့ သူတပါးတိုင်းပြည်မှာ နေချင်သလိုနေ၊ ထိုင်ချင်သလိုထိုင်၊ စားချင်သလိုစား၊ သွားချင်သလိုသွား၊ လာချင်သလိုလာလို့ မရဘူးဆိုတာ နိုင်ငံခြားရောက်ဖူးသူတိုင်း သိပြီးဖြစ်ကြပါလိမ့်မယ်။

ဒီမိုကရေစီနိုင်ငံဖြစ်တဲ့ မလေးရှားနိုင်ငံဟာ မြန်မာပြည်ထက်ပင် အမှောင်ထဲက ဒုစရိုက်သမား၊ မသမာသူများ သာ၍ပေါများပါသေးတယ်။ မလေးရှား အတိုက်ခံပါတီတွေရှိသလို ဆန္ဒပြပွဲတွေကလည်း ရှိထားတော့ လတ်တလော နိုင်ငံရေးဟာ မငြိမ်မသက်ဖြစ်နေတယ်။ ဒါ့အပြင် မလေးရှား လဝက (လူဝန်မှုကြီးကြပ်ရေး)ရဲ့ တရားမဝင်နိုင်ငံခြားသားများ လျှော့ချရေး အစီအမံတွေကြောင့် အများသူငါ ရုံးပိတ်ရက် စနေ၊ တနင်္ဂနွေ လိုနေ့များမှာ မြို့တွင်းလူစည်ကားရာ နေရာတိုင်း တွေ့ကရာမြင်ကရာ နိုင်ငံခြားသားလို့ ထင်ရတဲ့လူတိုင်းကို ဟိုဟာစစ်၊ ဒီဟာစစ် လုပ်ကြပါတယ်။ မြန်မာလူမျိုးတွေက အဲလိုအစစ်ဆေးခံရမှာမျိုးကို တရားဝင်နေထိုင်တာပဲဖြစ်စေ၊ တရားမဝင်နေတဲ့သူပဲဖြစ်စေ ဖိန့်ဖိန့်တုန်အောင် ကြောက်ကြပါတယ်။ ဒီလိုပါတ်ဝန်းကျင် အခြေအနေ မငြိမ်မသက်မှုတွေကြားထဲက မလေးရှားရောက် ဘလောဂ့်ဂါများ ကြိုးစားပြီးတော့ တနင်္ဂနွေအားလပ်ရက်တစ်ခုမှာ ဒီတွေ့ဆုံပွဲလေးကို မဖြစ်ဖြစ်အောင် လုပ်ခဲ့ပါတယ်။

ဘလော့ဂ်ဂါတွေ့ဆုံပွဲကို မလေးရှားနိုင်ငံ ကွာလာလမ်ပူမြို့ ဆိုဂိုကုန်တိုက်အတွင်းရှိ နတ်ပြည်နန်းတော် စားသောက်ဆိုင်၌ ကျင်းပပြုလုပ်ခဲ့ပါတယ်။ ဤပွဲသို့ ဘလောဂ့်ဂါ(၁ဝ)ဦး၊ ဧည့်သည်တော် (၄)ဦး စုစုပေါင်း (၁၄)ဦးတက်ရောက်ခဲ့ပါတယ်။ အစီအစဉ်က ရုတ်တရက် ထလုပ်ခဲ့ရတာဖြစ်လို့ မလေးရောက် ဘလော့ဂ်ဂါများအားလုံးကို စုံစုံလင်လင် ဖိတ်ကြားနိုင်ခြင်း မရှိခဲ့ပါဘူး။ ဖုန်းနံပါတ် သိရှိထားသူများလောက်ကိုသာ ဆက်သွယ်အကြောင်းကြားနိုင်ခဲ့ပါတယ်။ ဒီပွဲကို မတက်လိုက်ရတဲ့ ဘလော့ဂ်ဂါများ ကျွန်တော်တို့အပေါ်မှာ နားလည်ပေးနိုင် လိမ့်မယ်လို့ ထင်ပါတယ်။ ဒီပွဲအစမှ အဆုံးထိဖြစ်မြောက် ပြီးစီးအောင် စီစဉ်ဆောင်ရွက်ခဲ့တဲ့ ကိုမိုးသွေးငယ်၊ ဒီပွဲမဖြစ်ဖြစ်အောင် ဝိုင်းဝန်းကူညီဆောင်ရွက်ပေးတဲ့ ကိုချစ်မိုးညို၊ ကိုco2zenith၊ အလုပ်တွေ မအားတဲ့ကြားကနေမှ ဒီပွဲကို တက်ရောက်ခဲ့တဲ့ အစ်ကိုကြီး ဒီရေ၊ ကိုရဲရင့်နီ၊ ကိုNEO ၊ ညီလေးCraton ၊ မညလေး၊ မသဇင်ဏီ၊ ဧည့်သည်တော်အဖြစ် အစ်ကိုဒီရေ၏ မဟေသီ(:D)၊ မညလေးနဲ့အတူ အဖော်ပါလာတဲ့ ကျွန်တော့်တို့အစ်ကိုကြီး (:D)၊ ခရီးဝေးကနေ အရောက်လာခဲ့တဲ့ မလေးလေး နှင့် မလေးရောက် ဝါသနာရှင်(စာဖတ်ပရိတ်သတ်) ညီမငယ်တစ်ဦးတို့ တက်ရောက်ခဲ့ပါတယ်။

ထိုတွေ့ဆုံပွဲဟာ ခုချိန်ထိတိုင်အောင် ကျွန်တော့်အာရုံထဲမှာ အမှတ်ထင်ထင်ကြီး ပြန်လည်သတိရ အောင့်မေ့နေမိတယ်။ တစ်ကြိမ်တစ်ခါမျှ လူချင်းတွေ့ဆုံခြင်း မရှိခဲ့ရဖူးသူတွေ အပြင်မှာတွေ့တော့ တကယ့် ညီအစ်ကိုမောင်နှမ သွေးရင်းသားရင်းတွေအလား ရယ်ကြ၊ မောကြနဲ့ စကားတွေကို ဖောင်ဖွဲ့ပြောဆို ကြပါတယ်။ လူချင်းမတွေ့ရတဲ့ အွန်လိုင်းထဲမှာကတည်းက တစ်ဦးစာကိုတစ်ဦး ရင်းနှီးကြပြီးသားပါ။

ကျွန်တော်တို့ မလေးရှားရောက် ဘလောဂ့်ဂါများ ဝဘ်ဆိုဒ်လေးထဲမှာ အရင်ကထက် ပိုပြီးတော့ နည်းပညာ၊ ရသ၊ သုတ၊ သတင်းကဏ္ဍတွေ စုံစုံလင်လင် ဖြစ်လာအောင် ဝိုင်းဝန်းရေးသားကြဖို့၊ မလေးရှားရောက် မြန်မာဘလောဂ့်များ ထပ်မံတိုးပွားလာဖို့ တစ်ဦးချင်းစီမှ တစ်ဖက်တစ်လှမ်းကနေ တတ်အားသမျှ ဝိုင်းဝန်းကူညီပေးကြဖို့နှင့် ရှေ့ဆက်၍ မလေးမြေဘလောဂ့်အား ရေရှည်တည်တံ့ရေးအတွက် ဆက်လက်ထိန်းသိမ်းသွားကြဖို့ အကြောင်းတွေ စသဖြင့် ဆွေးနွေးတိုင်ပင်ဖြစ်ခဲ့ပါတယ်။ နောင်တစ်ချိန်ကာလ၌ ဤမလေးမြေဘလောဂ့်တွင် ပါဝင်ရေးသားခဲ့သူများ မိမိတို့ သက်ဆိုင်ရာ ဌာနေအသီးသီးသို့ ပြောင်းရွှေ့ကြလျှင်လည်း ဘလော့ဂ်ဂါမှတ်တမ်းစာရင်းတွင် အမှတ်တရ ထားရစ်ကာ ကျန်ရှိနေဦးမှာဖြစ်သလို နောက်ထပ်ဝင်လာဦးမည့် အသစ်အသစ်သော ဘလော့ဂ်ဂါများကိုလည်း ဆက်လက်ရေးသားခွင့်ပြုသွားဦးမှာ ဆိုတဲ့အကြောင်းတွေ အားလုံးမှ သဘောတူ ဆန္ဒပြုခဲ့ကြပါတယ်။

ကျွန်တော်တို့ ဘလောဂ့်ဂါတွေ့ဆုံပွဲသို့ အလုပ်တာဝန်အသီးသီး မအားလပ်တဲ့အကြားမှ တက်ရောက်ခဲ့ကြသော ဘလော့ဂ်ဂါများနှင့် ဧည့်သည်တော်အချို့အား ကျေးဇူးများစွာ တင်မိပါကြောင်း အမှတ်တရပြောရင်း ကျွန်တော်တို့ရဲ့ ဤမွန်မြတ်သန့်စင်သော စေတနာနဲ့ အားထုတ်မှုသည် လူ့လောကရဲ့ တစ်ထောင့်တစ်နေရာမှနေ၍ တစ်စုံတစ်ခု အကျိုးပြုပေးသွားနိုင်မည်ဆိုလျှင် ကျွန်တော်တို့ အချိန်ကုန်ခံ၊ လူအပင်ပန်းခံရကျိုးနပ်ပါပြီ။

ဆက်ဖတ်ကြည့်မယ်......

ပြန်ခေါက်ပေးရန်....

တိုင်းတပါးက အဖြစ်အပျက်မှန်တွေ အမြန်ဆုံးသိနိုင်ကြပါစေ...

သူငယ်ချင်းများသို့ ...

သူငယ်ချင်းရေ...
မင်းကြီးပြင်းလာတဲ့ မွေးရပ်ဌာနေ
မြန်မာပြည်မှာ ငါလည်းမင်းလို
ဖြတ်သန်းရင်း ကြီးပြင်းခဲ့ရဖူးပါတယ်...။

ဒါပေမယ့်... ဘ၀ဆိုတာ
တစ်နေရာတည်းမှာ တစ်သတ်မတ်တည်း
ပုံသေကားချပ် ဆက်တည်မြဲချင်မှ မြဲတာလေ...

တိုးတက်မှုဆိုတာ နေရာတကာမှာ
ခေတ်နောက်ကျနေတဲ့ မြန်မာပြည်ရဲ့
အခြေအနေ ဖြစ်ရပ်မှန်တွေကို
ငါသိခဲ့ပြီးတဲ့ နောက်ပိုင်းမှာတော့
မြန်မာပြည်ရဲ့ အလုပ်တွေကရှားပါး
မိသားစုစားဝတ်နေရေး အခြေအနေတွေက
တစ်နေ့ထက်တစ်နေ့ ပိုလို့ဆိုးရွားလာရင်း
ကြီးပွားရေးလမ်းစ အစရှာမရတဲ့
ကိုယ့်တိုင်းပြည်မှာ အနေကြာလာချိန်
ရင်ဆိုင်နေရတဲ့ ဘ၀နေ့ရက်တွေကို
ငါပိုပိုပြီး ခါးသီးလာမိတယ်...။

အဲဒီ့နောက် ...
ဘ၀ကိုလည်းနာကျည်း ငါ့တိုင်းပြည်ကြီးကိုလည်း
ခေတ္တနှုတ်ဆက်ပြီး တိုင်းတပါးမှာ
ဘ၀တိုးတက်ရာ လမ်းအစ ဖွေရှာခဲ့တယ် ...။

သူငယ်ချင်းရေ ...
တိုင်းတပါးက ကြုံဆုံရတာတွေ
ငါသိခဲ့ရတဲ့ ဘ၀အသိတရားတွေ
လောကသစ္စာတရားတွေ မင်းသိစေချင်လို့
မင်းကိုလေ..ဖောက်သည်ချ ပြန်ပြောပြရဦးမယ် ...။

သူငယ်ချင်းရေ ...
တိုင်းတပါးဆိုတာ ရေလည်းခြားသလို
မြေလည်းခြားတယ် လူမျိုးခြားတယ်
ဘာသာတရား ယဉ်ကျေးမှုများဆိုရင်
ပိုလို့ပင် ကွာခြားသေးတယ် ...။

ဘာသာစုံ ဓလေ့စုံ ယဉ်ကျေးမှုတွေစုံ
လူမျိုးတွေကလည်းစုံလို့ အကုန်စုံစီနဖာဖြစ်နေတာ
တိုးတက်တဲ့ ဒီမိုကရေစီ တိုင်းပြည်ကပါ ...။

ဒါပေမယ့် ..သူငယ်ချင်းရယ်...
အဲဒီ့ စုံစီနဖာ တိုင်းပြည်ကြီးမှာ
ကြာရှည်အောင် ငါမပျော်နိုင်ပါဘူး ...။

ဘ၀ဆိုတာ ...
တစ်ခုခုကိုပေးဆပ် စွန့်စားပြီးမှ
လိုချင်တာကို ရယူပိုင်ဆိုင်ရတာမျိုး
ဘ၀ဆိုတာ...
ထိုက်ထိုက်တန်တန် ကိုယ့်ဘက်က
တန်ပြန်မပေးဆပ်ဘဲ အချောင်ရလိုက်တာတွေ
မရှိသလောက် နဲပါးပါတယ်...။

ဘ၀အတွက် ပေးဆပ်မှုတွေ
နစ်နာဆုံးရှုံးလိုက်ရတဲ့ အဖြေစ်တွေဟာ
သူတပါးတိုင်းပြည်မှာ ပိုဆိုးပါတယ် သူငယ်ချင်းရာ...။
ကိုယ့်အသက်ကိုယ် ဖက်နဲ့ထုပ်လို့
သေခြင်းတရားကို ထွေခင်းကစားရင်း
တိုင်းတပါးမှာ ဘ၀ရှင်သန်နေရတာဟာ
ကိုယ့်အတွက်တော့ ကျီးလန့်စာစားဘ၀
မ၀တ၀လေကို ရှုရှိုက်နေရသလိုမျိုး
ရေရေရာရာ ခိုင်ခိုင်မာမာ
ကိုယ့်အတွက်ဆိုတာ ဘာမှအသေအချာ
မရှိသလောက်ပါပဲ သူငယ်ချင်းရယ် ...။

ထပ်ပြောရဦးမယ် သူငယ်ချင်းရေ ...
ငါအထင်ကြီးထားတဲ့ နိုင်ငံခြားမှာလေ
ထင်ထားတာနဲ့ တယ်ခြားနားပါတယ်
နိုင်ငံခြားရောက်မှ ငါ့စိတ်ဓါတ်တွေ
အကြိမ်ကြိမ် ပျောက်ကျခဲ့ရဖူးတဲ့
ငါ့နေ့ရက်တွေကို ပြန်မရေတွက်နိုင်အောင်ပါပဲ ...။

ပထမအစမှာ ငါယိုင်လဲလာတယ်
တဖြည်းဖြည်းနဲ့ ငါယိုင်လဲနေတဲ့ ခြေထောက်ကို
အားတင်းကြိုးစားရင်း ပြန်လည်ခိုင်မြဲအောင်
ပြန်လည်ရပ်တည်ကြိုးစားရတယ် ...။

ငါ့နဘေးနားက လူငယ်တွေတချို့လည်း
ဘ၀တွေ ယိုင်လဲပြိုကျကုန်တယ် ...။
တချို့အားတင်းပြီး မျှော်လင့်ချက်ထား
အနာဂါတ်အတွက်အားတွေနဲ့ ပြန်ထကြတယ် ...။

တချို့အားလျှော့ပြီး မျှော်လင့်ချက်မဲ့
အနာဂါတ်တွေပျောက်လို့ ဘ၀ကိုအရှုံးနဲ့
ရင်ဆိုင်သွားကြတယ် ...။

ငါကတော့ အပြုံးနဲ့ ရင်ဆိုင်လိုက်တယ် ...။

တစ်ကယ်တော့ .. တိုင်းတပါးဆိုတာ
ရေမြေလေထု ကိုယ့်အတွက် ခိုင်မာမှု မရှိဘဲ
ကြာရှည်ဘ၀ ရပ်တည်ကြမယ်ဆိုရင် ...
အဆင်မပြေမှုတွေ များစွာနဲ့ပဲ
ဆက်လက်ကြုံတွေ့နေကြရဦးမှာပဲလေ ...။

ငါ့နဘေးနားက လူတွေ တချို့ ဒုက္ခတွေရောက်နေကြချိန်
ငါကိုယ်တိုင်ကလည်း ဒုက္ခတွေကို ရင်ဆိုင်ကြုံတွေ့နေရချိန်
ငါသူတို့ကို ကယ်တင်ချင်ပေမယ့် ဘာမှမတတ်နိုင်ပါဘူး ...။
ငါတတ်နိုင်တာလေးတော့ ငါလုပ်လိုက်ပါတယ် ....။

အဝေးမြန်မာပြည်က သူငယ်ချင်းများ
တိုင်းတပါးက အခြေအနေမှန်တွေကို
အမြန်ဆုံးသိနိုင်ကြပါစေလို့
ကဗျာမပီ စာမညီတဲ့
ဒီခံစားချက်တွေကို
ပုံဖော်ထုတ်ရင်း ငါအနိုင်နိုင်
ကာရံတွေသီကာ ရေးစပ်လိုက်တယ် ....။

အဝေးက သူငယ်ချင်း
(၆-၁၀-၂၀၀၉)

ဆက်ဖတ်ကြည့်မယ်......

ပြန်ခေါက်ပေးရန်....

အဝေးရောက် လူငယ်များအတွက် ဘ၀ အမောပြေ..အလွမ်းပြေ

အဝေးကအမေ သိစေချင်တယ်

တစ်ကယ်တော့... အမေရယ်...
နိုင်ငံရပ်ခြား တိုင်းတပါးဆိုတာ
အမိမြေနဲ့ ခွဲခွာဖူးသူတိုင်း
သိခဲ့ကြတဲ့ အသိတရားတစ်ခုက
တစ်ဘ၀တာမဟုတ်ဘဲ တစ်ခဏစာအလုပ်လုပ်ဖို့
ရောက်လာခဲ့ကြတာပဲ မဟုတ်လား....?။

တစ်ကယ်တော့... အမေရယ်...
နိုင်ငံခြားမှာ အလုပ်သွားရှာတာဟာ
အဆင်မပြေတဲ့ ဘ၀ရဲ့အကြပ်အတည်းတွေကို
ဖြေရှင်းဖို့အတွက် ပြေးထွက်ခဲ့တဲ့ ထွက်ပေါက်တစ်ခုဆိုရင်...
ဒါဟာ...ဖြစ်သင့်တဲ့ ထွက်ပေါက်အမှန်လား...?။

တစ်ကယ်တော့... အမေရယ်...
သားတိုးထွက်ခဲ့တဲ့ နိုင်ငံခြားဆိုတဲ့
တံခါးပေါက်ရဲ့ နောက်ကွယ်မှာလေ
တွေ့ဆုံကြုံကြိုက် ရှောင်မရလိုက်တဲ့
အဖြစ်တွေက စာဖွဲ့လို့မကုန်နိုင်အောင်
များပြားလွန်းပါရဲ့ အမေရယ်...။

တစ်ကယ်တော့... အမေရယ်...
လူတွေထင်မှတ်ထားကြသလို တိုင်းတပါးမှာရှိတဲ့
အလုပ်အကိုင် ဘ၀အခွင့်အလမ်းတွေဟာ
အဆင်ပြေချင်မှ ပြေလည်ကြတာပါ
ဘ၀ခရီးလမ်း ဆုံးခန်းမတိုင်မှီ
ရည်မှန်းချက် တစ်ဝက်တစ်ပျက်နဲ့
လူငယ်တချို့ ဘ၀ရေတိမ်မြုပ်ကြရရှာတယ်...။
တချို့လူငယ်တွေ သေကြေပျက်စီးကြရရှာတယ်...။
တချို့လူငယ်တွေ ကြေကွဲစွာ ငိုရှိုက်ငြီးတွားကုန်ကြတယ်...။

တစ်ကယ်တော့...
စွန့်ရဲမှစားရတယ်ဆိုတာ တိုင်းတပါးမှာပါအမေရယ်...
ဘ၀ကိုစတေး ခန္ဒာအားပေးဆပ်လို့
အသက်သွေးချွေးနဲ့ ရင်းနှီးခဲ့ကြတဲ့နောက်မှာ
ရရှိလာမယ့် အကျိုးခံစားခွင့်တွေဟာ
ကိုယ်ပေးဆပ်လိုက်ရတာနဲ့ ထိုက်ထိုက်တန်တန် ရှိပါလေစ...။

ဒါပေမယ့်လေ... အမေရယ်...
ဒုက္ခဆိုတဲ့ လောကဓံအကြောင်းတရားတွေဟာ
လူတစ်ယောက်ရဲ့ ဘ၀ကို
ပျော့နေတဲ့ဖရောင်းကနေ သံချောင်းလိုမာအောင်
မာနေတဲ့သံချောင်းကနေ ဖရောင်းလိုအရည်ပျော်သွားအောင်
ပြောင်းလဲပစ်နိုင်တဲ့ အစွမ်းသတ္တိတွေရှိတယ်လေ...။

တစ်ကယ်တော့... အမေရယ်...
သားသိလိုက်ရတဲ့ အသိတရားတစ်ခုက
ဒုက္ခတွေတသီကြီးခံနေတဲ့ ဘ၀ခရောင်းလမ်းနဲ့
လူငယ်တွေအတွက် ဘ၀အရည်အချင်းတွေ
ဆန်းစစ်မြှင့်တင်ပေးနေတဲ့ လောကဓံကျောင်းတော်ကြီးဟာ
ဟိုးအဝေးက တိုင်းတပါးမှာရှိနေတယ်ဆိုတာ
အဝေးကအမေ မြင်ကြည့်လှည့်စေချင်တယ်....။

အဝေးကသား
(၃-၁၀-၂၀၀၉)

ဆက်ဖတ်ကြည့်မယ်......

ပြန်ခေါက်ပေးရန်....

သံသရာရှည်ခရီးသို့ တစ်ခေါက်.... (ခေတ္တခဏ နှုတ်ဆက်ခြင်း)

ကျွန်တော်တစ်ယောက် ရုတ်တရက် အမှတ်မထင်ပဲ ဘုန်းခနဲ ပြုတ်ကျလာခဲ့သော ဘ၀အခြေအနေ အကြောင်း တရပ်ကြောင့် မည်သူ့ကိုမျှနှုတ်ဆက်နိုင်ခြင်းမရှိဘဲ အဝေးတစ်နေရာဆီသို့ အထီးကျန်ဆန်စွာနဲ့ ခရီးထွက်ခွာ သွားခဲ့ရပါတယ်။ အဲဒီ့နေက မိုးတွေအရမ်းသဲနေခဲ့ပြီး ကျွန်တော့်ဘ၀ဟာလည်း မိုးသဲသဲအောက်က ခြေနင်းပြား ဖက်ရွက်တခုလို စိုရွှဲကြေမွနေခဲ့ပါပြီ။

ယခု ကျွန်တော်ရောက်နေတဲ့ နေရာက မလေးရှားရဲ့ စည်ကားသော မြို့ကလေးတစ်မြို့မှာပါ။ လူသံ၊ သူသံ၊ ကားသံ တညံညံနဲ့ ရင်ထဲမှာလည်း မျှော်လင့်ချက်တွေနဲ့ ဆူညံပွက်နေခဲ့တယ်။ ရှေ့ဆက်ဖြစ်မယ့် ကိုယ့်ဘ၀ကိုတောင် ဘာမှန်း ရေရေရာရာ မသိခဲ့ရဘူး။ ဆိုးရွားလွန်းလှတဲ့ ဘ၀ကြမ္မာ အဖြစ်သနစ်တွေအကြားမှာ အနေကြာလာတော့ ဘ၀ရဲ့ အထုအထောင်းဒဏ်တွေကို ကြံ့ကြံ့ခံလာနိုင်တယ်။

ရုတ်ချည်းပြောင်းလဲသွားတဲ့ ဘ၀ကြမ္မာကို နဲနဲမှ ကြောက်လန့်တုန်လှုပ်ခြင်းမရှိပါ။ ပြုံးပြုံးလေးပဲ ရင်ဆိုင်လိုက်တယ်။ ကိုယ့်လိုလူသားတွေလည်း ဘေးမှာ တသီးကြီး လျှောက်လှမ်းနေကြဆဲဆိုတာကို သိလိုက်ရတော့ ပျော်ရွှင်အောင်နေတတ်လာတယ်။

တကယ်တော့ ကျွန်တော်ဟာ ဘ၀သံသရာ ခရီးရှည်ထဲက ဒုက္ခလူသား တစ်ယောက်ပါလားလို့ တွေးတတ်လာတယ်။ ပိုးဖလံဆိုတဲ့အမျိုးကလည်း ပူမှန်းသိရက်နဲ့ မီးကိုပဲတိုးတတ်သလို ကျွန်တော်ကလည်း ဒုက္ခတွေ တသီကြီး ခံနေတဲ့ ခရောင်းလမ်းကိုမှ ဇွတ်အတင်း လျှောက်ချင်နေမိတာပါပဲ။

ဘ၀ဟာ ရှေ့ဆက်လျှောက်လေလေ ပိုပြီးတော့ အဓိပ္ပာယ်ရှိကာ ပြည့်ဝလာလေလေပဲ။ လူငယ်တိုင်းရဲ့ ရင်ဘတ်ထဲမှာ မျှော်လင့်ချက်တွေ ကိုယ်စီနဲ့မို့ ကျွန်တော့်မှာလည်း မှေးမှိန်စွာရှိနေတဲ့ မျှော်လင့်ချက်လေးတွေက ပိုပြီးတော့ အရောင်တောက်ပလာတယ်။ ရှေ့ဆက်လျှောက်လှမ်းရမယ့် တကိုယ်တည်း ဘ၀လမ်းအတွက် အထီးကျန်ဆန်တာ မှန်ပေမယ့် ကျွန်တော် ၀မ်းနည်းပြီး ထိုင်မနေတတ်ပါ။ ဘ၀ခံယူချက်၊ ယုံကြည်ချက်တွေကို အားပြုပြီး အံကို ကြိတ်ကာ ဆက်လျှောက်နေခဲ့တယ်။ တနေ့နေ့တော့ အဲဒီ့မျှော်လင့်ချက်တွေဆီကို ရောက်သွားဦးမှာဆိုတာ ယုံကြည်နေဆဲပါ။

ဆက်ဖတ်ကြည့်မယ်......

ပြန်ခေါက်ပေးရန်....

ရွှေ့ပြောင်းအလုပ်သမား

ကျွန်တော်ရောက်သွားတဲ့ နေရာက တခြားမဟုတ်ပါဘူး။ မလေးရှားမှ လုပ်ငန်းရှင် သူဌေးများနှင့် အလုပ်သမားများအကြား ဆက်သွယ်ပြီး အလုပ်သမားဝန်ဆောင်မှုတွေ လုပ်ပေးနေတဲ့ အလုပ်သမားရေးဆိုင်ရာ အေဂျင်စီရုံးတစ်ခုမှာပါ။

ဟိုရောက်တော့ ၀င်ဝင်ချင်း မြန်မာစကားပြန် တယောက်က မေးခွန်းတွေ တရဆက်ထုတ်လာပါတယ်။ ဘာဖြစ်လို့ ပြန်လာတာလဲ..?။ ဘာလဲ..?။ ညာလဲ..?။ မြန်မာလိုပေါ့ဗျာ။ ကျွန်တော့်မျက်နှာ တည်တည်ပဲ.. ကျွန်တော်ဘာမှမဖြစ်ဘဲ ပြန်လာတာလို့ ပြန်ပြောလိုက်တယ်။

အဲဒီ့အေဂျင်စီမှာ ရောက်ခဲ့တဲ့ မြန်မာအလုပ်သမားပေါင်း များစွာရဲ့ ပြသနာပေါင်း သောင်းခြောက်ထောင် ဖြေရှင်းပေးခဲရပြီးပြီဆိုတော့ သူတို့ ဒီလိုမေးရင် ဒီလိုဖြေရမယ်ဆိုတာ ကျွန်တော့် ဦးနှောက်က အော်တို သိနှင့်ပြီးသားပဲလေ။ တကယ်လည်း ကျွန်တော့်မှာ အလုပ်ရှင်နဲ့ ဘာပြသနာမရှိခဲ့ပါဘူး။ တခြားလူပိုလူလျှံ အလုပ်သမားလျှော့ချခြင်း ကိစ္စများကြောင့်သာဖြစ်ကြောင်း ကျွန်တော်က အေးဂျင်စီရုံးကို ပြန်လည် ဖြေရှင်းပြခဲ့တယ်။

ဒါနဲ့ပဲ ကျွန်တော့်ကို ထုံးစံအတိုင်း ဒုတ်နဲ့ ရိုက်နှက်ခြင်း၊ ဂျပန်လို ပါးရိုက်ခြင်းများ မပြုလုပ်တော့ဘဲ လျှောလျှောရှုရှု အပေါ်ထပ်က အလုပ်သမားများ နားနေခန်းထဲမှာ သွားနေခိုင်းပါတယ်။ အပေါ်ရောက်တော့ မြန်မာလူငယ်များ ဒုက္ခကိုယ်စီ၊ ပြသနာကိုယ်စီနဲ့ အိပ်တဲ့သူက အိပ်၊ ထိုင်တဲ့သူကထိုင်လို့။ သူတို့ မျက်နှာတွေကြည့်မိကာမှ ကိုယ်တောင် စိတ်ဓါတ်တော်တော်ကျသွားတယ်။ ဒါပေမယ့် ကိုယ့်ကိုယ်ကို ပြန်ပြီးတော့ အားတင်းနိုင်လိုက်ပါတယ်။ လောက သဘာဝတရားကို နားလည် သဘောပေါက်နေခဲ့ပါပြီ။

လောကဓံရဲ့ ရိုက်ပုတ်ခြင်းနဲ့ အထုအထောင်းဒဏ်တွေကို ကောင်းကောင်းခံစားခဲ့ရသည်မှာ လွန်ခဲ့သောနှစ်များစွာတိုင်ကပင် ရှိခဲ့ချေပြီ။ နဘေးနားက လူများကိုလည်း တတ်နိုင်သလောက် အားပေးစကား ပြောရသေးသည်။

စိတ်မကောင်းသည်မှာ မြန်မာတွေ အတော်များများဟာ ပြည်ပမှာ ဗဟုသုတ နဲပါးခြင်းဖြစ်သည်။ လူငယ်အများစုက အတွေးအခေါ် မှားယွင်းတတ်ကြရာမှ အစပြုကာ ဒုက္ခရောက်ကြရခြင်း ဖြစ်သည်။

ပိုပြီးတော့ စိတ်မသက်မသာဖြစ်ရသည်မှာ တစ်ကမ္ဘာလုံး စီးပွားပျက်ကပ်ဆိုက်ချိန် မလေးရှားမှာလည်း အလုပ်သမား အခွန်ကောက်မှုနှုန်းကလည်း မြင့်တက်လာတော့မည်ဆိုတဲ့ သတင်းနဲ့အတူ မြန်မာအလုပ်သမားတွေ အလုပ်ရှင်ရဲ့ မတန်တဆ ဖိနှိပ်ခံရမှု သတင်းတွေကြောင့်ပါပဲ။ အကြွေးနဲ့လာတဲ့သူတွေ ဒုက္ခအကြီးအကျယ် ရောက်ကြရသည်။ ပေးစရာငွေမရှိ ပြေးစရာမြေမရှိဆိုတာ ဒါပါပဲဗျာ။

စာရေးတဲ့ ၀ါသနာပါသူပီပီ လူမှုဘ၀ အစုံကို အပြင်ဘက်ကနေ ထွက်ပြီး အကဲခတ် သုံးသပ်နေမိတယ်။ ကိုယ်ကိုယ်တိုင်ကလည်း ဒုက္ခကို ပုခုံးထမ်းထားရတုန်းပဲ ဆိုပါတော့။

မလေးရှားရောက် မြန်မာအလုပ်သမားတွေရဲ့ ဘ၀ဟာ တယ်လည်း မသေးလှဘူးဆိုတာ အေဂျင်စီရုံးကို ရောက်ကာမှ ပိုပြီး သိလာတယ်။ အဲဒီမှာ မြန်မာ မိန်းကလေးတွေကလည်း ရှိနေသည်။ သူတို့လည်း အလုပ်ပြောင်းရန် စောင့်ဆိုင်းနေကြသည်မှာ နှစ်ပါတ်လောက်တောင် ရှိပြီလို့ သိရတယ်။ တခြား ကျန်တဲ့သူတွေကလည်း ကိုယ့်ဒုက္ခနဲ့ကိုယ်ပင် ရှိနေကြပြီး အလုပ်အသစ်ကို ပြောင်းရွှေ့ဖို့ စောင့်ဆိုင်းနေကြဆဲ။

ကျွန်တော့်ကို အဲဒီ့နေ့ရဲ့ ညနေဘက်မှာ ကားနဲ့ လာခေါ်တယ်။ ရုံးခန်းထဲရောက်တော့ အင်တာဗျူးတယ်။ မင်းအရင်လုပ်ခဲ့တဲ့ အလုပ်က အနေချောင်တယ်၊ နဲနဲ သက်သာတယ်။ ဒါပေမယ့် အခုလုပ်ရမယ့် အလုပ်က နဲနဲ ပင်ပန်းမယ်၊ ကြမ်းတမ်းမယ်လို့ အလုပ်သမား အေဂျင်စီရုံးက တရုတ်သူဌေးက ပြောတယ်။ ဟုတ်ကဲ့ ရပါတယ်ဗျာ ပြောရုံကလွဲလို့ အခြား ရွေးစရာလမ်းမရှိတော့ဘူး။ ဒါနဲ့ အလုပ်သစ်အတွက် အားမွေးနေမိတယ်။ နောက်နေ့ညနေဘက်မှာ အလုပ်သစ်နေရာကို လိုက်ပို့ပါတယ်။

အပြောင်းအလဲ သိပ်များတဲ့ ကျွန်တော့်ဘ၀ဟာ နောက်တနေ့မနက်မှာပဲ အလုပ်သစ်နဲ့ ဘ၀သစ်စခဲ့ပါပြီ။ နေရာသစ်မှာ အားလုံး အံဝင်ခွင်ကျ ဖြစ်အောင်လို့ အရင်ဆုံး ကြိုးစားရဦးမည်။ အင်တာနက်ဆိုတာကြီးနဲ့လည်း ဝေသွားပါပြီ။

ကျွန်တော့် ဘလော့ဂ်လေးကို အမှတ်တရအဖြစ် ထားရစ်ခဲ့ပါတယ်။ စာပုဒ်ရေပေါင်း(၄၀)ကျော် တင်နိုင်ခဲ့သည်။ တချို့နဲ့ မိတ်ဆွေတွေ ဖြစ်ခဲ့ရသည်။ ဘလော့ဂ်ရေးခြင်း အလုပ်ထဲမှ သော့ချက် တချို့ ရှာဖွေတွေ့ရှိခဲ့ရသည်။ ဒီလို ဘလော့ဂ်ရေးခြင်းအလုပ်ကို ကျွန်တော့်အမြင်အရ အားပေးပါတယ်။ စာရေးခြင်း ၀ါသနာပါသည့်အလျောက် ကွန်ပျူတာနဲ့ အနေနီးစပ်မှု ဓါတ်ခံရှိတဲ့ လူတွေအတွက် ဘလော့ဂ်ဂါဖြစ်ဖို့ (၉၉.၉၉)ရာခိုင်နှုန်း သေချာပါသည်။

ကိုယ်ပိုင်ကွန်ပျူတာမရှိတဲ့ (မ၀ယ်နိုင်သေးတဲ့) ကျွန်တော်ကတော့ ဗဟုသုတ၊ စာပေ၊ ရသ ပညာတွေ စုံလင်လှတဲ့ အိုင်တီလောကကြီးနဲ့ အနေဝေးသွားပါပြီ။

ဒီ့အတွက် ကျွန်တော်ဝါသနာပါတဲ့ ဘလော့ဂ်ရေးခြင်းကိုလည်း အဆက်ဖြတ်ရပေတော့မည်။ စာအုပ်အကြမ်းထဲမှာ ဖြစ်သလိုရေးခြစ်ထားတဲ့ စာတွေက (၁၆)မျက်နှာကျော်လောက်ရှိမယ်ထင်တယ်။ အဲဒီ့စာတွေ ဘလော့ဂ်ပေါ်မှာ အချိန်မှီ မတင်လိုက်နိုင်ခြင်းအတွက် စိတ်မကောင်းပါ။ အားလုံးကိုလည်း ခေတ္တခဏ နှုတ်ဆက်ခဲ့ပါတယ်။

ဆက်ဖတ်ကြည့်မယ်......

ပြန်ခေါက်ပေးရန်....

Myanmar Font Converter

မိမိစက်ထဲမှာရှိနေတဲ့ ဇော်ဂျီဖောင့်(သို့မဟုတ်) အခြားဖောင့် ဝင်းအင်းဝဖောင့် ဖြစ်စေ၊ မြန်မာသရီးဖောင့်ဖြစ်စေ အလွယ်တကူပြောင်းလဲလို့ ရနိုင်တဲ့ ဖောင့်ကွန့်ဗာတာလေးနှစ်ခု ဖြစ်ပါတယ်။ ပြောင်းလို့ရနိုင်တဲ့ ဖောင့်အမျိုးအစားတွေကို သိချင်ရင် ဖောင့်ကွန့်ဗာတာမှာပါတဲ့ ဘယ်ညာနှစ်ဖက်စီက ဖောင့်အညွှန်းတွေကို မောက်စ်နဲ့ကလစ်ထောက်ပြီး ကြည့်ရင် သဘောပေါက်သွားပါလိမ့်မယ်။ ဒီနေရာမှာ တစ်ခုသတိပြုရမှာက ဇော်ဂျီကနေ ဝင်းအင်းဝပြောင်းချင်တယ်ဆိုပါစို့။ ဇော်ဂျီတော့ရှိပါရက်နဲ့ ဝင်းအင်းဝဖောင့် မရှိရင် မိမိပြောင်းလိုက်တဲ့ ၀င်းအင်း၀ဖောင့်က စာတွေမြင်ရလိမ့်မည်မဟုတ်ပါ။ ဒီ့အတွက် ဖောင့်အမျိုးအစားတွေ ရယူထားဖို့ လိုအပ်ပါသည်။

ဖောင့်ကွန့်ဗာတာအတွက် ကနောင် ဆော့ဖ်ဝဲလေးကို ဒီနေရာမှာ ဒေါင်းလုပ်ချပါ။ ပြီးတာနဲ့ zip file ကိုဖွင့်ပြီး အသင့်အသုံးပြုနိုင်ပါပြီ။ ဖိုင်ဆိုဒ်က မကြီးတာကြောင့်မို့ install လုပ်ပေးစရာလဲမလိုပါ။ မိမိစက်ထဲက Desktop ပေါ်တင််ထားပြီး လိုအပ်တဲ့အခါတိုင်း ဖွင့်သုံးသွားရုံပါပဲ။ လုပ်နည်းဟန်လေးတွေကို အောက်မှာ ပုံများနှင့်တကွ ရှင်းလင်း ပြသထားပါတယ်။

ဒေါင်းလုပ်ချပြီးသား ကနောင်ဆော့ဖ်ဝဲလ် zip file ကိုစဖွင့်လိုက်တဲ့ပုံပါ။



ပြီးတာနဲ့ Install လုပ်စရာမလိုပဲ အလွယ်တကူ ဖွင့်ပြီး အသုံးပြုရုံပါပဲ။



ဒါကတော့ အသုံးပြုရမယ့် အမျိုးအစားတွေကို select ချယ်ပြထားတဲ့ပုံပါ။



အလွယ်တကူ အသုံးပြုဖို့အတွက် ကွန်ဗာ့တာ (၃)မျိုးအား Desktop အပေါ်မှာ ဆွဲတင်ထားလိုက်ပါတယ်။



converter.exe ကိုဖွင့်ပြီး တိုက်ရိုက် စာရိုက်ကာ အခုလို အလွယ်တကူ ဖောင့်ပြောင်းလဲ အသုံးပြုသွားနိုင်ပါတယ်။




Kanaung Converter C++.exe ကတော့ ကွန်ဗာ့ဖောင့် တော်တော်စုံတယ်။ သုံးလို့ကောင်းတယ်။ နမူနာပုံစံ ဇော်ဂျီ၀မ်းဖောင့်မှ ယူနီကုဒ်အမျိုးအစား မြန်မာ-၃သို့ ပြောင်းထားပါတယ်။





မိမိလိုအပ်ရာ ဖောင့်တွေကို အလွယ်တကူ ပြောင်းလဲရင်း အဆင်ပြေချောမွှေ့စွာ ဆက်လက် ဘလော့ဂ်ဂင်းနိုင်ကြပါစေ။

ဆက်ဖတ်ကြည့်မယ်......

ပြန်ခေါက်ပေးရန်....

လေ့လာမိသမျှ မြန်မာယူနီကုဒ် အကြောင်း တစေ့တစောင်း (၄)

မြန်မာယူနီကုဒ်နဲ့ ဇော်ဂျီဖောင့်ကို အဆင်ပြေပြေ တွဲသုံးနိုင်ရေးအတွက် လိုအပ်တဲ့ အခြေခံ လုပ်ဆောင်မည့် အဆင့်တွေဖြစ်ပါတယ်။

ဇော်ဂျီယူနီကုဒ် နောက်ဆုံး ဗားရှင်းကို ဒီနေရာမှာ သွားပြီး ဒေါင်းလုပ်ချပါ။

အဆင့်ဆင့် Next ဆိုပြီး ကလစ်ပေးလိုက်ပါ။

နောက်ဆုံး Finish နှိပ်လိုက်ပါ။

အင်စတော လုပ်အပြီး ကွန်ပြူတာကို restart လုပ်မှာလား၊ restart မလုပ်ဘဲ ဒီအတိုင်း ထားမှာလားလို့ မေးလာပါတယ်။ ကိုယ်ပိုင် ကွန်ပြူတာရှိသူတွေ အတွက်တော့ restart လုပ်လည်း ဘာမှ ပြသနာမရှိပါဘူး။ စက်ပြန်ဖွင့်တဲ့အခါ အင်စတော လုပ်ပြီးသားက သူ့အတိုင်း ရှိနေမှာကိုး။ နိုင်ငံခြားက အင်တာနက်ဆိုင်တွေမှာတော့ ဒီလိုလုပ်လို့ မရဘူး။ restart လုပ်တာနဲ့ ဖျက်ပြီးသားဆိုတော့ ကျွန်တော်ကတော့ restart မလုပ်ဘဲ cancel ကုိုပဲ ရွေးချယ်ပေးလိုက်တယ်။

မီးလျှံမြေးခွေး (ခေါ်) Mozilla Firefox ကိုဒေါင်းလုပ်ချ အင်စတော လုပ်ပြီးတာနဲ့ Firefox ဝင်းဒိုး က သူ့အလိုလို တက်လာပါလိမ့်မယ်။ အပေါ် menu ဘားတန်းတွေထဲက Tools Menu ကို Left Click တစ်ချက်နှိပ်ပြီး Options ရွေးပါတယ်။

Content ကို ထပ်ရွေးပါ။

Default Font မှာ ညာဘက် မြှားလေးကို ရွှေ့ပြီး myanmar 3 ကိုရွေးလိုက်ပါတယ်။

ပြီးတာနဲ့ ညာဘက်က Advanced ထဲကိုဝင်လိုက်ပါ။

အောက်မှာ ပြထားတဲ့အတိုင်း Serif, Sans- serif, Monospace တွေမှာ အစဉ်လိုက် Myanmar 3, Zawgyi-One, Zawgyi-One ရွေးချယ်ထားလိုက်တယ်။

အောက်က Default Character Encoding မှာ Unicode (UTF - 8) ကိုရွေးချယ်ပေးပါ။

အားလုံး ပြီးတာနဲ့ Ok အဆင့်ဆင့်ပေးပြီ ထွက်လိုက်ပါတယ်။

အထက်ပါ အဆင့်တွေ လုပ်ဆောင်ပြီးတဲ့နောက် အောက်မှာ ပြထားတဲ့ ပုံတွေအတိုင်း ဇော်ဂျီနဲ့ ယူနီကုဒ် နှစ်မျိုးစလုံးကို အဆင်ပြေပြေ အသုံးနိုင်တာကို တွေ့မြင်ရမှာ ဖြစ်ပါတယ်။

ဆက်ဖတ်ကြည့်မယ်......

ပြန်ခေါက်ပေးရန်....

လေ့လာမိသမျှ မြန်မာယူနီကုဒ် အကြောင်း တစေ့တစောင်း (၃)

ဒေါင်းလုပ်ချထားတဲ့ မြန်မာ-၃ zip file ကို အရင်ဖြေလိုက်ပါတယ်။


တတိယမြောက် မှာ မောစ်နဲ့ ကလစ်ထောက်ထားတဲ့ မြန်မာသရီးဖောင့်အား Control Panel ရှိ Font Folder အတွင်းသို့ ထည့်သွင်းရန် ယာယီ Desktop ပေါ် Draf ဆွဲကူးထားလိုက်ပါတယ်။

Start > control panel > Font ကို အဆင့်ဆင့်ဖွင့်လိုက်ပြီး Desktop ပေါ်က မြန်မာ-၃ ဖောင့်ကို မောက်စ်နဲ့ Draf ဆွဲကူးလိုက်ပါ။ ဒီလိုမှမဟုတ်လဲ zip file ပေါ်မှာ မြန်မာ-၃ကို ညာဘက်ကလစ်နှိပ်ပြီး အင်စတောဖောင့် လုပ်ပြီး Ran နိုင်ပါသေးတယ်။ ကျွန်တော်ကတော့ နက်ဆိုင်မှာ အဆင်ပြေသလို လုပ်ရတယ်။

Font Folder ထဲ ကော်ပီကူးပြီး ရောက်သွားတဲ့ပုံလေးပါ။

မြန်မာ-၃ ဖောင့်ကို အဆင်ပြေပြေ ဖတ်ရှုနိုင်ဖို့ အတွက် မီးလျှံမြေခွေးခေါ် Mozilla Firefox Browser တစ်ခု ရှိဖို့ လိုအပ်ပါလိမ့်မယ်။ ဒီ့အတွက် ဒီနေရာကနေ ကြိုက်နှစ်သက်ရာ version တစ်ခုကို ရွေးပြီး ဒေါင်းလုပ်ချလိုက်ပါ။ ကျွန်တော်ကတော့ ဒါလေးပဲ သင့်တော်မယ်ထင်လို့ ယူလိုက်တယ်။ ပြီးတာနဲ့ Next အဆင့်ဆင့်ပေးပြီး နောက်ဆုံး Finish ပေးလိုက်ရင် ပြီးတာပါပဲ။

မြန်မာ-၃ ကီးဘုတ် လက်ကွက်ကို အင်စတော လုပ်ရန် zip file ကို ပြန်ဖွင့်ပါ။

ဒုတိယမြောက်ရှိ Keyman Free ကိုရွေးပြီး မောက်စ်နဲ့ Double Click နှစ်ချက်ဆက်တိုက် နှိပ်လိုက်တယ်။

ပုံမှာ ပြထားတဲ့အတိုင်း အဆင်ဆင့် Run ပါတယ်။

လေးထောင့်ကွက်နေရာမှာ အမှန်ခြစ်ပေးလိုက်ပါတယ်။

နောက်ဆုံး Finish ပေးလိုက်ရင် Auto Alert Message တစ်ခု ကွန်ပြူတာရဲ့ ညာဘက်အောက်ထောင့်ခြေမှာ ပြလာပါလိမ့်မယ်။

မြန်မာ-၃ zip file ကို ပြန်ဝင်ပြီး ပဥမမြောက်က myanmar3.kmx ကို မောက်စ်နှစ်ချက် ကလစ်နှိပ်ပြီး Run လိုက်ပါသေးတယ်။

တဂ်ဘားမှာ ညာဘက်ကလစ် တစ်ချက်နှိပ် Keyman Configuration ကို ရွေးပြီး အောက်မှာ ပြထားတဲ့အတိုင်း Ctrl - Alt - M ကိုသတ်မှတ် ပေးလိုက်ပါတယ်။ အခြား နှစ်သက်ရာ အတိုကောက် ကီးများလည်း ရွေးချယ်ပေးနိုင်ပါတယ်။

နက်ဆိုင်မှာ ကျွန်တော် အသုံးပြုနေတဲ့ အဓိက ဆော့ဝ်ဝဲ (၃)ခုပါ။ ဒါတွေကြောင့် တက်လူငယ် ဖြစ်လာခဲ့တာပေါ့။ နောင်များမှ ဆက်ရေးသွားပါဦးမယ်။

ဆက်ရန်...

ဆက်ဖတ်ကြည့်မယ်......

ပြန်ခေါက်ပေးရန်....

လေ့လာမိသမျှ မြန်မာယူနီကုဒ် အကြောင်း တစေ့တစောင်း (၂)

မြန်မာယူနီကုဒ်ဆိုင်ရာ လက်တွေ့ လေ့လာစမ်းသပ်ချက်များ

အင်တာနက်ဆိုင်ကနေ ကြုံသလို သုံးပြီး ဘလော့ဂ်ရေးနေရတဲ့ ကျွန်တော့်အတွက်တော့ တော်တော့်ကို ခက်ခက်ခဲခဲ ကျော်ဖြတ်ခဲ့ရပါတယ်။ နေရာတိုင်းမှာ အခက်အခဲဆိုတာ ရှိနေတတ်သလို အဲဒီ့အခက်အခဲတွေကို ဖြေရှင်းဖို့ နည်းလမ်းတွေကလည်း ရှိနေတတ်ပြီးသားပါ။ ရအောင် ကြံဖန်ရှာဖွေကြည့်လိုက်တော့ မြန်မာယူနီကုဒ်အတွက် လိုအပ်တဲ့ ဆော့ဖ်ဝဲများ ဒေါင်းလုပ်ချနိုင်တဲ့ နည်းလမ်းတွေ၊ ဒေါင်းလုပ်ချပြီးသားကို နောက်ထပ် အလွယ်တကူအသုံးပြုဖို့ အိပ်ဆောင် Memory Card ထဲမှာ အဆင်သင့် အမြဲရှိနေအောင် သိမ်းထားသင့်တဲ့ အတွေးတွေပါ ရလာခဲ့တယ်။ အဲဒီ့အတွေးအတိုင်း လုပ်ဆောင်ခဲ့ပါတယ်။ ဒါက မြန်မာယူနီကုဒ်အတွက် ကျွန်တော် ကျော်ဖြတ်ခဲ့တဲ့၊ ပြင်ဆင်ခဲ့ရတဲ့ အချိန်ကာလ၊ အခက်အခဲတွေထဲက ရလာတဲ့နည်းလမ်းတွေဖြစ်ပါတယ်။ နောင်တစ်ချိန်မှာ အင်တာနက်ဆိုင်က ကြုံသလို အရေးပေါ် အသုံးပြုနေရသူများအတွက်ပါ ကျွန်တော့်လို မဖြစ်ရအောင် သင်ခန်းစာပြန်ပေးနိုင်ဖို့ နည်းလမ်းတွေ တစ်ခါတည်းရလိုက်တာပေါ့။

ကျွန်တော်အခုလို ရေးပြ ဆွေးနွေးပြနေခြင်းဟာ ကျွန်တော့်ထက် တော်တဲ့ တက်တဲ့ သူတွေကို ရည်ရွယ်ပြီး ထိခိုက်လိုစိတ်နဲ့ ပိုစ့်တင်နေခြင်းမဟုတ်ဘူး ဆိုတာကိုတော့ ကြိုတင် ဝန်ခံပါရစေ။ အင်တာနက်နဲ့ အမြဲ ရင်းနှင်းကျွမ်းဝင်မှု မရှိသေးတဲ့ ကျွန်တော့်အတွက် အမျိုးမျိုး အချိန်ပေးပြီး ခက်ခက်ခဲခဲ လေ့လာခဲ့ပြီးမှ ရလာတဲ့ အသိပညာ၊ နည်းလမ်းလေးတွေကို ဝေမျှလိုတဲ့ ရည်ရွယ်ချက်သာဖြစ်ပါတယ်။ စာဖတ်သူတွေထဲမှာ နားလည်တတ်ကျွမ်းတဲ့ သူတွေ ပါလာခဲ့ရင်လည်း အကြံပြုတဲ့ စာတွေ ရလာနိုင်အောင် ရည်ရွယ်ရေးသားခြင်း ဖြစ်ပါတယ်။

ယူနီကုဒ်အတွက် ပြင်ဆင်ခြင်း ပထမအဆင့်

ဒီနေရာလေးမှာ မြန်မာသရီး ဇင့်ဖိုင်ကို အရင်ဆုံး ဒေါင်းလုပ်ချလိုက်ပါတယ်။ ပြီးတာနဲ့ ဇင့်ဖိုင်ကို ဖြေပါတယ်။ ဇင့်ဖိုင်ကို ဖြေနိုင်တဲ့ ဆော့ဖ်ဝဲကို နောက်ပိုင်းမှ ကိုမှော်ဆရာရဲ့ ဘလော့ဂ်ရောက်တော့ ဒေါင်းလုပ်ဖို့ လင့်လေးရခဲ့ပါတယ်။ ယူနီကုဒ်အတွက် ပိုစုံတဲ့ နေရာလေးတစ်ခုက ဒီဟာလေး ပါ။ အချို့ မြန်မာပြည်က လှမ်းသုံးနေရတော့ ဘလော့ဂ်စပေါ့ ဖွင့်မရဘူးလို့ ပြောတာကြောင့် ပထမလင့် ကတော့ မြန်မာပြည်ကလူတွေ အတွက် အဆင်ပြေမယ်လို့ ထင်ပါတယ်။

ကျွန်တော်သုံးနေတဲ့ အင်တာနက်ဆိုင်မှာ ညာဘက်က ခလုပ် (Right Click)နှိပ်ခွင့် မရှိသလို၊ အခြား အပိုင်းတွေလည်း တော်တော်များများ ကန့်သတ်ထားတယ်။ ဒါပေမယ့် တစ်ခါသုံး အင်စတော လုပ်ခွင့်ပေးထားတယ်။ အင်စတောလုပ်ပြီး စက်ပြန်ပိတ်လိုက်တာနဲ့ ရှိသမျှ အကုန်ဖျက်ပြီးသားပဲ။ စောပိုင်းက ဆော့ဖ်ဝဲနဲနဲပဲရှိသေးလို့ မေးလ်ထဲမှာ Draf ဆွဲပြီး ဆေ့ဖ်လုပ်ထားခဲ့ပေမယ့် နောက်ပိုင်း ဒေါင်းလုပ်ချတဲ့ ဆော့ဖ်ဝဲတွေ များလာတော့ Memory Card တွေနဲ့ ထည့်ပြီး သုံးတတ်လာတယ်။ ဘလော့ဂ်ရေးမယ်ကြံတိုင်း လိုအပ်တဲ့ ဆော့ဖ်ဝဲတွေကို ကွန်ပြူတာထဲ အင်စတော ခဏခဏ လုပ်နေရပါများတော့ အချို့ဟာတွေဆို အလွတ်တောင် ရလာတယ်။ နောင်များမှ ဒီအကြောင်းတွေ ဆက်ရေးပါဦးမည်။

ဇင့်ဖိုင်ကို အလွယ်တကူ ဖြေချင်ရင် ဒီနေရာက ဒေါင်းလုပ်ချလိုက်ပါ။ ကျွန်တော်ကတော့ ကြုံသလို ဖြေလိုက်တယ်။ Run လိုက်တယ်။ အဲဒီ့အဆင့်တွေကို နောက်နေ့မှ ပုံတွေနဲ့ ဆက်ပြပါမယ်။ ကိုမှော်ဆရာရဲ့ ဘလော့ဂ်မှာ ဒီကနေ သွားရောက်ဖတ်ရှုရင်လည်း ပြည့်ပြည့်စုံစုံ နည်းလမ်းတွေ ရနိုင်ပါတယ်။

ဆက်ရန်..

ဆက်ဖတ်ကြည့်မယ်......

ပြန်ခေါက်ပေးရန်....

ဘလော့ဂ်နှင့် ကျွန်တော် တွေးခေါ်ဆင်ခြင်လေသော်

(၂ဝဝ၈)မှ (၂ဝဝ၉)ခုနှစ်သစ်သို့ အကူးအပြောင်းမှာ ဟိုမရောက်ဒီမရောက် ပိုစ့်(၃ဝ)ရေးခဲ့ပြီးလို့ ကိုယ့်ကိုယ်ကို ဘလော့ဂ်ဂါတစ်ယောက်တော့ ဖြစ်လောက်ပြီဟု ခံယူထားလိုက်ပါသည်။ စိတ်ထဲမှာ ဘလော့ဂ်ရေးနေရခြင်း အကြောင်းအရင်း ကိုလည်း အမြဲတမ်းပြန်လည်ဆန်းစစ် ကြည့်နေရသည်။ ရှေ့နောက်အကျိုးအကြောင်း ဆီလျော်မှု ရှိ၏၊ မရှိ၏ ဘယ်လိုယုံကြည်ချက်နဲ့ ခက်ယူချက်ကြောင့်ရေးနေရခြင်းဖြစ်သနည်း?။ ကိုယ့် အတွက်ရော ဘယ်လိုအကျိုးမျိုးတွေ ဖြစ်ထွန်းလာခဲ့သလဲ..?။ လာဖတ်တဲ့သူတွေကရော ကိုယ်ရေးတဲ့ စာတွေကို နှစ်ခြိုက်သဘောကျ လက်ခံပါ့မလား..?။ ကိုယ်လုပ်နေတဲ့ အလုပ်တစ်ခုအပေါ်တွင် ကောင်း၏၊ ဆိုး၏ ဆိုတာကိုတော့ သုံးသပ်ရ၏။ ထိုကဲ့သို့သော လား..? ပေါင်းများစွာ..လဲ..? ပေါင်းများစွာသော မေးခွန်း တွေကြောင့် ဘလော့ဂ်နှင့် ကျွန်တော် တွေးခေါ်ဆင်ခြင်လေသော် ပိုစ့်အသစ်တစ်ခုဖြစ်လာခဲ့ပါတော့သည်။

ကျွန်တော်၏ ဘလော့ဂ်ရေးခြင်းသက်တမ်းမှာ နုနည်သေးသော်လည်း ထိုက်သင့်သလောက် အတွေ့အကြုံ များစွားကိုတော့ (၃)လတာခရီး လျှောက်လှမ်းအပြီး ဘလော့ဂ်ဂါဘဝမှာ ရရှိခဲ့ပါသည်။ ထိုအတွေ့အကြုံများထဲမှ လက်တွေ့ကျကျ နားလည်သဘောပေါက်လာခဲ့သော အသိပညာလေးတွေကို ပြန်လည်ဝေမျှပေးလိုက်ပါသည်။ ဘဝအခြေအနေ အကြောင်းအမျိုးမျိုးကြားမှ အလုပ်လုပ်ရင်း၊ ကျောင်းတက်ရင်း ပြည်းတွင်းပြည်ပ နိုင်ငံတစ်ကာပေါင်းစုံနေ၍ စာရေးနေကြတဲ့ မြန်မာဘလော့ဂ်ဂါရပ်ဝန်းမှာ ကြုံတွေ့ သိမြင်ခဲ့ရတာလေးတွေ ဖြစ်ပါသည်။ (စာရေးတဲ့ ဘလော့ဂ်ဂါဟုဆိုရာတွင် မြန်မာစာပေကို ညစ်ငြမ်းစေသော၊ မြန်မာ့ယဉ်ကျေးမှုနှင့် ဖီလာဆန့်ကျင်သော အကြောင်းအရာများ၊ လူပုဂ္ဂိုလ် တစ်ဦးနှင့်တစ်ဦး အကျိုးမရှိ အပြန်အလှန်တိုက်ခိုက်သော၊ လိဒ်ကိစ္စအကြောင်းအရာများ ရေးနေကြတဲ့သူများကို စာရေးသူ ဘလော့ဂ်ဂါဟု မသတ်မှတ်လိုပါ။)

ဘလော့ဂ်ဂါတစ်ယောက်မဖြစ်သေးခင်မှာ အခြားဘလော့ဂ်တွေကို လေ့လာရင်း သူတို့တွေကို အတုခိုးအားကျမိလာတတ်ရာမှ ဘလော့ဂ်ရေးချင်စိတ်ပေါက်လာတတ်သလို၊ မိမိကိုယ်တိုင်ကိုက စာရေးခြင်းဝါသနာထုံနေသည့်အပြင် ကွန်ပြူတာ၊ အင်တာနက်နှင့်လည်း အတော်အသင့် ရင်းနှီးကျွမ်းဝင်မှု စတဲ့အခြေခံအရည်အချင်းတွေရှိပါမှ ဖြစ်လာနိုင်ပေမည်။ အဓိကအချက်ကတော့ စာရေးခြင်းသည် အနုပညာတစ်ခုသဖွယ်သည့်အလျှောက် ဝါသနာထုံတဲ့စိတ်ရှိပါမှ ဘလော့ဂ်ဂါတစ်ယောက်အဖြစ် ဆက်လက်ရပ်တည်နိုင်ပေမည်။

တစ်ချို့ကတော့ အချစ်ကြောင့် အသဲကစားရင်း စိတ်လှုပ်ရှားစပြုကာ ကိုယ်တိုင်ကလည်း စာရေးချင်တဲ့စိတ် ဗီဇဓါတ်ခံလေးရှိနေတော့ နှလုံးသားထဲက မနေနိုင် မထိုင်နိုင် ပွင့်ထွက်လာတဲ့ ကဗျာတွေ၊ စာတွေကို ဘလော့ဂ်ထဲမှာ ပုံချရင်း ကဗျာဆရာတွေ၊ အလင်္ကာဆရာတွေတောင် ဖြစ်လာကုန်ကြသည်။ တစ်ချို့ကတော့ အချစ်ကြောင့် အသဲကွဲရင်းမှ ကဗျာတွေ၊ စာတွေပွင့်ထွက်လာရင်း ဘလော့ဂ်ဂါ ဖြစ်လာခဲ့ပုံရပါသည်။ ရေးရင်းရေးရင်း ခံစားချက်တွေ ကောင်းလာသလို ကဗျာတွေ၊ စာတွေဟာလည်း ပြောင်မြောက်လာကြသည်။

တစ်ချို့ကတော့ နိုင်ငံရေးစိတ်ဓါတ်၊ မျိုးချစ်စိတ်ဓါတ်ပြင်းထန်လာသဖြင့် မြန်မာအစိုးရ၏ နေ့စဉ်ထုတ် တရားဝင် သတင်းစာမျက်နှာပေါ်တွင် မပါရှိသော သူတို့ရဲ့ရင်ထဲက အမှန်တရားတွေကို လွတ်လပ်သော ဘလော့ဂ်အပေါ်မှာ နေ့စဉ်နှင့်အမျှ စေတနာဗလပွနှင့် ဖော်ကြူးပြသခဲ့ကြလေသည်။

တစ်ချို့ကတော့ ဘဝမှာမှာတွေ့ကြုံခဲ့ရပုံတွေကို ဒိုင်ယာရီအလား ဘလော့ဂ်မှာ ရေးထားကြလေသည်။ ဘဝမှာကြုံတွေ့ခဲ့ရတဲ့ ကိုယ်တွေ့ ဖြစ်ရပ်မှန်ခံစားချက်တွေကို ဘလော့ဂ်မှာ ပုံချကြသည်။ မိမိကိုယ်တိုင်လည်း လုပ်ခဲ့ဖူးပါသည်။ အပြန်အလှန်ဖတ်ပေးကြတဲ့ ဘလော့ဂ်ဂါတွေရဲ့ အားပေးနှစ်သိမ့်မှုတွေကြောင့်၊ စကားလက်ဆောင်တွေကြောင့် လန်းဆန်းတက်ကြွခဲ့သလို၊ အားတက်သရောလည်း ဆက်ရေးဖြစ်ခဲ့မိပါသည်။ တစ်ကယ်တော့ ဘလော့ဂ်ရေးခြင်းဟာလည်း ဘဝဒိုင်ယာရီ စာမျက်နှာအပိုင်းအစ တစ်ခုဖြစ်ပါသည်။ ဘဝစာမျက်နှာအပြည့် ဘလော့ဂ်မှာ ဆက်ရေးသွားမယ်ဆိုရင်တောင် ရနိုင်ပါသည်။

တစ်ချို့ကတော့ ဗုဒ္ဓဘုရား၏ တရားဓမ္မတော်ဆိုင်ရာများ ရေးသားကြပြီး လောကမှာ အေးချမ်းစွာဖြင့် ငြိမ်းငြိမ်းချမ်းချမ်း ရှိနေစေချင်သော ဘလော့ဂ်ဂါများဖြစ်ကြသည်။ တစ်ချို့ကတော့ ဗေဒင်အတတ်ပညာ ဆည်းပူးလေ့လာထားသမျှတွေကို ရေးနေကြပြီး အပြင်မှာတောင် ဟောစားလို့ရလောက် ကောင်းတဲ့ စေတနာရှင် ဘလော့ဂ်ဂါများဖြစ်ကြလေသည်။

တစ်ချို့ကတော့ ဘဝဒဿနတွေကို ဘလော့ဂ်မှာ ရေးပြကြသည်။ နည်းပညာဆိုင်ရာဗဟုသုတွေကို ပြန်လည်ဝေငှပေးကြသည်။ တစ်ချို့ဘလော့ဂ်များဟာဆိုရင် စွယ်စုံကျော်ထင်လောက်အောင် အရေးအသား၊ အကြောင်းအရာကော၊ ဗဟုသုတကော အဘက်ဘက်က ပြည့်စုံကောင်းမွန် နေကြ လေသည်။

တစ်ချို့လည်း အဝင်တော့ ကောင်းပြီး ဘဝအခြေအနေ အကြောင်းအရင်းအမျိုးမျိုးကြောင့်ဖြစ်စေ၊ မိမိကိုယ်တိုင်က စိတ်မပါတော့လို့ဖြစ်စေ တစ်ဖြည်းဖြည်း မှေးမှိန် ပျောက်ကွယ်သွားတတ်ကြပြန်သည်။ အမှန်တရားဖော်ထုတ်တဲ့ ဘလော့ဂ်ဂါတစ်ယောက် ဆုံးရှုံးသွားရခြင်းအတွက် နှမြောဖို့ကောင်းပါသည်။ မိမိကိုယ်တိုင်ကလည်း ဘဝအနေအကြောင်းအရင်း အမျိုးမျိုးကြောင့် ရံဖန်ရံခါ ဘလော့ဂ်ကို ပိတ်ပြီး တိတ်တဆိတ် ကျောခိုင်းနှုတ်ဆက်ထွက်ခွာသွားဖို့ အကြိမ်ကြိမ် စိတ်ကူးမိခဲ့ဖူးပါသည်။ သို့ပေမယ့် စာရေးခြင်းအစ ဘဝမှတ်တိုင်ဖြစ်တဲ့ ဤဘလော့ဂ်လေးကို မစွန့်ခွာရက်ခဲ့ပါ။ ကိုယ့်လိုဖြစ်နေသူများကို တွေ့ရင်လည်း ခံစားချက်ခြင်းတူစွာ စာနာ နားလည်မိပြီး အားပေးခဲ့စမြဲပါ။

ဤကဲ့သို့ ဝါသနာရှင်အမျိုးမျိုးရဲ့ နှလုံးသားမှ ဖြစ်တည်အရင်းခံထားတဲ့ စေတနာရှင် ဘလော့ဂ်များစွာ ပေါ်ထွန်းလာခဲ့ကြလေသည်။ ဘလော့ဂ်တွေပေါ်လာမှ စာအရေးအသားကောင်းတဲ့ ရွက်ပုန်းသီးလေးတွေရှိမှန်း သိလာရတယ်လို့ နာမည်ကြီး ဘလောဂ့်ဂါတစ်ဦးက သုံးသပ်ထားပါသည်။ အမှန်တစ်ကယ်လည်း ဟုတ်သည်။ ဘဝအခြေအနေ အကြောင်းအရင်း အမျိုးမျိုးကြောင့် စာရေးဆရာ/ဆရာမတွေ မဖြစ်လာဘဲ အခကြေးငွေယူပြီး စာရေးမစားကြရုံတစ်မယ် အရေးအသား ကောင်းမွန်တဲ့ ဝါသနာရှင် ဘလော့ဂ်ဂါတွေကို တွေ့နေမြင်နေရသည်။ လောကကြီးရဲ့ဘယ်နေရာမှာမှ ရှာလို့မတွေ့နိုင်တဲ့ အမှန်တရားစစ်စစ်တွေကို ဘလော့ဂ်လောကမှာတင် မျက်ဝါးထင်ထင်တွေ့မြင်ခဲ့ရသည်။ ထိုကဲ့သို့ ဘလော့ဂ်အမျိုးအစားပေါင်း စုံလင်လှသော ဘလော့ဂ်ဂါရပ်ဝန်းမှာ သူတို့တွေ ဘာအတွက်ကြောင့် ဆက်လက်ရပ်တည်နေကြတာလဲ..?။ မြန်မာပြည်က စာ၊ နယ်၊ ဇင်းတွေမှာ ရေးကြသူများလို စာမူခလည်းရသည်မဟုတ်။ တစ်စုံတစ်ရာ အကျိုးခံစားခွင့်များလည်း ရသည်မဟုတ်။ ဘလော့ဂ်ဂါတွေရဲ့ရပ်တည်ချက်တွေကို စဉ်းစားကြည့်လိုက်တော့ အဖြေကရှင်းရှင်းလေးပါ။

၁။ မိမိတို့ ယုံကြည်ချက်၊ ခံယူချက်၊ ဘဝရပ်တည်ချက်အမြင်နှင့် ဝါသနာအလျှောက် စာရေးချင်စိတ်ရှိတဲ့ ဘလော့ဂ်ဂါတွေဖြစ်ကြပါသည်။

၂။ မိမိဘဝတစ်လျှောက် လေ့လာခဲ့သမျှ အသိပညာ၊ ဗဟုသုတ၊ အတွေးအမြင်ရသတွေကို ဝေငှ ဖော်ထုတ်ချင်သော စိတ်ရှိတဲ့ ဘလော့ဂ်ဂါတွေကြပါသည်။

၃။ တစ်ဦးနှင့်တစ်ဦး အတွေးအမြင်တွေ ဖလှယ်ကြရင်း ကောင်းကျိုးများစွာ ပေါ်ထွန်းလာစေချင်တဲ့ ရည်ရွယ်ချက်ရှိတဲ့ ဘလော့ဂ်ဂါတွေဖြစ်ကြပါသည်။

၎။ ထိုအခြေအနေမျိုးကြားမှ မိမိတို့ အချိန်ကုန်ခံလုပ်ခဲ့သမျှ ရရှိလာတဲ့ အကျိုးကျေးဇူးမှာ စာဖတ်သူ၏ အသိအမှန်ပြုတဲ့ စာစကား မှတ်ချက်လေးတွေပင် ဖြစ်ပါသည်။ ဘာနဲ့မှ လဲလို့မရတဲ့ အဖိုးတန် စာမူခတွေပါပဲ။

မည်သို့ဆိုစေ ကျွန်တော်တို့တွေ အတူတကွ လက်တွဲကာ စည်းလုံးညီညာပြီးတော့ ဟိုးအဝေးမှ မှုံရီမှုံဝါး ဆုံမှတ်တိုင်တစ်ခုဆီသို့ အရောက်လျှောက်လှမ်း သွားကြရအောင်ပါ။

ဆက်ဖတ်ကြည့်မယ်......

ပြန်ခေါက်ပေးရန်....

ဘဝ ပရိုဂရမ်နဲ့ ဆက်တက်ဦးမယ့် တက်လူငယ်

ကျွန်တော့်အတွက်တော့ ဒီဇင်ဘာလဟာ အများတကာလို ပျော်ရွှင်ကြည်နူးစွာနဲ့ လာမည့် နှစ်သစ်ကို ကြိုဆိုရမည့်အစား တသသဖြင့် လွမ်းမောဆို့နင့်စွာနဲ့ပဲ ကြိုဆိုလိုက်ချင်တော့တယ်။ ဒီဇင်ဘာလကုန်ရင် အလုပ်က အပြောင်းအလဲရှိနိုင်သလို ကောင်းချင်လည်း ကောင်းသွားမည်။ ဘယ်လိုမှ အတိအကျ ခန့်မှန်းလို့ မရတဲ့ လက်ရှိ ဘဝအနေအထားမှာ ရင်ထဲကခံစားချက်တွေကို ဖွင့်ထုတ်ပစ်ဖို့ရာ ဘလော့ဂ်မှာ ခဏခဏ သယ်လာမိခဲ့တာလည်း အကြိမ်ကြိမ်ပါပဲ။ ဘလော့ဂ်လေးရဲ့ နှလုံးခုန်သံနဲ့ ရှင်သန်မှုလေး ရပ်တန့်မသွားအောင် ထိန်းပေးနေရချိန်မှာ ထွက်ချည်ဝင်ချည် အသက်ရှုသွင်းနေရတဲ့ ဆန့်တငင်ငင်နဲ့ ဘလောဂ်ဂါ တစ်ယောက်လို ဖြစ်နေပါပြီ။

လက်ရှိကျွန်တော်နေထိုင်ရာ ပါတ်ဝန်းကျင်မှာ ခရစ်စမတ် ပွဲတော်အတွက် အသင့်ပြင်ဆင်နေကြတဲ့ ရွယ်တူလူငယ်လေးတွေ တက်ကြွစွာလှုပ်ရှားနေကြတာတွေ့ရတော့ သူတို့ကြည့်ပြီး ကိုယ်က တစ်ယောက်တည်း ကြိတ်ကာ အဖော်မဲ့ အထီးကျန်ဆန်နေသလို ခံစားမိရပါသည်။ အနီရောင်စင်းကြား သိုးမွှေးခေါင်းစွပ်အရှည်ကြီးကို ဆောင်းလိုက်၊ ချွတ်လိုက် လုပ်ရင်း သူတို့အချင်းချင်း ပျော်ပျော်ရွှင်ရွှင် စနောက်နေကြလေရဲ့။ ကောင်လေးနဲ့ ကောင်မလေးတွေက လက်တွဲလို့ အတူနွှဲကာ ဒီဇင်ဘာပွဲမှာ ပျော်ပွဲဝင်ဖို့ ကြိုတင်ကာပြင်ဆင်နေကြလေရဲ့။ ကိုယ်ကတော့ အဲ့ဒီ့အချိန်မှာ အစီအစဉ်မကျနသေးတဲ့ ဘဝပရိုဂရမ် တစ်ပုဒ်ကို ကောင်းအောင်ကြိတ်မှိတ်ရေးဆွဲနေရတုန်း။ သက်ပြင်းတစ်ချက် အသာချလေး ချလိုက်ပြီး '' သူတို့ဘဝကို အားကျလို့ကော မင်းအတွက် ဘာဖြစ်လာမှာလဲ..? ကိုယ့်ဘဝပရိုဂရမ်ကို ကိုယ့်ဖာသာ ကောင်းအောင် ရေးဆွဲနေရာမှာ၊ ဘယ်သူမှ လာကူဆွဲမပေးဘူး၊ မင်းအဲ့ဒါကို သလေဘောပေါက်လား..? '' လို့ ကိုယ့်ကိုယ်ကို ပြန်မေးရင်း ပီပြင်တဲ့ဘဝတစ်ခုဖြစ်လာဖို့ အတွက် ရှေ့ဆက်လျှောက်ဖို့ အားတင်း ထားလိုက်မိတယ်။ တစ်ချိန်တည်း တစ်ပြိုင်တည်းမှာပဲ ကျွန်တော့် နှုတ်ခမ်း တစ်စုံဟာ အလိုလို ကွေးညွှတ်သွားပြီး မချိပြုံးလေး တစ်ချက် ပြုံးလိုက်မိပါတယ်။ '' ရေရေရာရာ မရှိတဲ့ဘဝမှာ လှောင်ရယ်စရာ လောက သဘောသဘာဝတွေ အကြားထဲက ဖြစ်ချင်သလိုဖြစ်နေတဲ့ ဘဝပရိုဂရမ် တစ်ပုဒ်ပါလား '' လို့ပေါ့လေ။

လွန်ခဲ့သော အတိတ်ရှိ ဆယ်စုနှစ်(၂)ခုစာကျော်ထဲမှာ ရေးဆွဲထားခဲ့တဲ့ ဘဝပရိုဂရမ်ကို စိတ်ကူးနဲ့ လှမ်း check နေမိပြန်တယ်။ ဝိုးတိုးဝါးတားဖြင့် ဘာမှကို အားရစရာ မရှိလှ။ အပီအပြင်လုပ်ဆောင်နိုင်ခဲ့တာ တစ်ခုမှ မရှိသေးဘူးလို့ထင်တယ်။ ခံစားချက်ချင်းက တိုက်တိုက်ဆိုင်ဆိုင် ဖြစ်ချင်တော့ တစ်နေ့က ကိုအိမ် ဘလော့ဂ်ဆီ ရောက်သွားတုန်း ဟိုမရောက်ဒီမရောက် ကျွန်တော် ဆိုတဲ့ပိုစ့်ကို ဖတ်လိုက်ရာတာ သူလည်း ကျွန်တော့်ဘဝ ပုံစံနဲ့ ခပ်ဆင်ဆင်ဖြစ်နေတယ်။ ဟိုစပ်စပ် ဒီစပ်စပ် လုပ်တတ်သည့် အကျင့်ကြောင့် ကျွန်တော်လည်း ဟိုတစ်တို့ ဒီတစ်တို့ ပညာလေးတွေ မတောက်တစ်ခေါက်လောက်တော့ စုဆောင်းမိခဲ့ပါသည်။ အွန်လိုင်းမှာ မိတ်ဆွေဘလော့ဂ်ဂါ တစ်ယောက် ပြောဖူးတဲ့ စကားလေးတစ်ခွန်းကို သွားပြီး အမှတ်ရမိတော့ ကိုယ့်ကိုယ်ကို အားမငယ်ချင်တော့ပါ။ '' ဘယ်အရာမဆို basics ဆိုတဲ့ အခြေခံတွေ ရှိနေဖို့ပဲလိုတယ် '' တဲ့။ သဘာဝကျကျ တွေးခေါ်ကြည့်လိုက်တော့ ဟုတ်နေသည်။ ငယ်စဉ်က ဖတ်းခဲ့ဖူးတဲ့ ပီမိုးနင်း စာအုပ်ထဲက '' တိုက်တစ်လုံးဟာ ဘယ်လောက်ပဲ အထပ်တွေများအောင် ဆောက်နေပါစေ အောက်ခြေမခိုင်ရင် (စံချိန်မမှီရင်) ပြိကျသွားမှာပဲ '' ဆိုတဲ့ စာလေးတစ်ကြောင်းကို သွားပြီးအမှတ်ရမိတယ်။ ဘယ်အရာမဆို အခြေခံရှိရုံမျှမက အဲ့ဒီ့အချိန်ခံကို စတည်ကတည်းက ကောင်းအောင် တည်ဆောက်ထားခဲ့ဖို့လိုအပ်တယ်။ '' ငါရော အခြေခံတွေ ကောင်းနေပြီလား ? '' ကိုယ့်ဖာသာ ပြန်မေးကြည့်လိုက်တော့ '' လိုအပ်ပါသေးတယ် '' ဆိုတဲ့ အဖြေပဲ ထွက်လာတယ်။

တစ်ခါတစ်ရံဘဝမှာ လုပ်ချင်တာတွေက သိပ်များလွန်းပြီး မဖြစ်လာသေးတာတွေ အတွက် အလိုမကျဖြစ်နေမိပြန်တယ်။ ဒါပေမယ့် ဘဝဆိုတဲ့ တောင်တက်လမ်းမှာ သက်လုံမကောင်း မောပြီးလက်လျှော့ ကျန်ရစ်နေခဲ့ လူတွေကလည်း အောက်မှာ မနည်းဘူး။ အထက်ကို မော့ကြည့်လိုက်ပြန်တော့လည်း ကိုယ့်ထက် ဇွဲကောင်းတဲ့၊ လုံ့လဝီရိယရှိကောင်းတဲ့ သူတွေ တစ်ချို့က အောင်လံတောင် လွှင့်ထူနေကြပြီ။ ကိုယ့်နဘေးနားမှာလည်း ဇွဲကောင်းကောင်းနဲ့ ဆက်တက်နေကြတဲ့ လူတွေကို တွေ့ရပြန်တယ်။ '' သြော်..ဒီလိုပါပဲလား '' လို့ သဘာဝကျကျ တွေးကြည့်ရင်း ပြုံးမိသေးတယ်။ ထူးထူးခြားခြား တစ်ချို့ကျတော့ ဘဝဆိုတဲ့ တောင်ကြီးမှာ အေးမြတဲ့ တရားရိပ်သာ စခန်းကြီးတွေထဲမှာ ရာသက်ပန်ဝင်ပြီး ကျန်နေရစ်ခဲ့တယ်။ သူတို့တွေကို ကြည့်ရသည်မှာ ပကတိ အေးချမ်းတည်ငြိမ် လှပပေတယ်။ ကျွန်တော်ကတော့ မောချင်မောပါစေ ရှေ့ဆက်တက်ရင် ဘာတွေ ဖြစ်လာဦးမလဲဆိုတာ သိချင်တဲ့အတွက် ဆက်တက်ဦးမည်။ ကိုယ့်နဘေးနားက အားနွှဲ့တဲ့သူတွေကိုလည်း တတ်နိုင်သလောက် ဖေးမကူညီပြီးလက်တွဲခေါ်နိုင်က ခေါ်သွားမည်။ ဘဝပရိုဂရမ် တစ်ပုဒ်ကို ဆက်ပြီးတော့ ရေးဆွဲကြည့်ချင်သေးသည်။ အဖြေက ဘာတွေ ထွက်လာဦးမလဲ..? ။ အဝေးမှာ မှုန်ရီပျပျမြင်နေ ရတဲ့ ပန်းတိုင်တစ်ခုနဲ့ ဆက်လျှောက်ရမည့် ဘဝလမ်းတစ်လျှောက်ကို လှမ်းမျှော် ကြည့်လိုက်ရင်း '' ဘဝ ပရိုဂရမ်နဲ့ ဆက်တက်ဦးမယ့် တက်လူငယ် '' ပါလားလို့ လေသံတိုးတိုးလေး ရေရွတ်လိုက်တယ်။

နောက်ဆက်တွဲစကား။ ကျွန်တော် တစ်ကယ်ကို မအားတဲ့ ကြားထဲက အလုအယက်အချိန်ယူပြီး ရေးလိုက်တဲ့ ပိုစ့်ပါ။ အင်တာနက် ပုံမှန်သုံးရဖို့ အခြေအနေတွေ ကလည်း ပေးမလာတော့ဘူး။ ဒီကြားထဲကမှ အိပ်ရေးပျက် ခံပြီး တင်လိုက်တဲ့ ပိုစ့်လေးပါ။ စီဘောက်မှာ လာနှုတ်ဆက်ကြတဲ့သူတွေကို တက်လူငယ် ပြန်လာပြီးတော့ မနှုတ်ဆက်နိုင်ခဲ့ရင်လည်း ခွှင့်လွှတ်ပေးကြပါ။

ဆက်ဖတ်ကြည့်မယ်......

ပြန်ခေါက်ပေးရန်....

ဂုဏ်ပြုရေးဖွဲ့ကဗျာ

ပေးဆပ်သူတို့ နှလုံးသားများ

ပြက္ခဒိန်ဟောင်း ရက်တွေပြောင်းနေ
ကျော်လွန်ဖြတ်သန်း ဘဝလမ်းတွေ
နာရီစက္ကန့် မိနစ်ဝက်မှ
တစ်ရက်မှသည် တစ်ပါတ်ဆီထိ
ရာသီတွေသာ အလီလီပြောင်း
ကုန်လွန်မှုပေါင်း အကြိမ်ထောင်သောင်း
ရှိခဲ့လေပြီ အတိတ်ဆီတွင်...

စိတ်အစဉ်သည် တရွေ့ရွေ့လှိမ့်
အတိတ်ကိုခေါက် နောက်ပြန်လျှောက်ကြည့်
မမြင်သော်လည်း စိတ်ကူးထဲမှာ
ပုံဖော်နိုင်သည် အာရုံဆီထိ

နံရံမှကြား စကားများလည်း
ရိုက်ခတ်လာသည် နားအိမ်ဆီတွင်

အမှောင်တွေလွှမ်း ဘဝလမ်းလည်း
လျှောက်ခဲ့ဖူးသည် အတိတ်ဆီတွင်

အသက်သွေးချွေး အစဉ်မနှေးဘဲ
ပေးဆပ်ခဲ့သည် အတိတ်ဆီတွင်

အမြင်ကိုဖျက် သော့တွေခတ်လျက်
သူတို့နှလုံးသား လှောင်ချိုင့်မှာထား
ဆယ်စုနှစ်ရှည် ကြာမြင့်လေအောင်
စတေးခဲ့ပြီး အတိတ်ခရီးတွင်

သူတို့ထားလျက် ယုံကြည်ချက်နဲ့
မျှော်လင့်ထားဆဲ ဘဝထဲမှာ
ကိုယ့်အတွက်ဆိုတာ ဘယ်အရာလဲ..?

သူတို့ကြည့်တာ အနာဂတ်မြန်မာ
သူတို့ပေးဆပ်တာ အနာဂတ်မြန်မာ
သူတို့ပေးအပ်တာ ပြည်သူများအတွက်ပါ
ကိုယ်ကျိုးမဖက် အများအတွက်
ပေးဆပ်သူများ နှလုံးသားပါ။

ဆက်ဖတ်ကြည့်မယ်......

ပြန်ခေါက်ပေးရန်....

အချစ်ဆိုသည်မှာ..?

ဒီကနေ့ ဘလော့ဂ်ကို စဖွင့်ဖွင့်ချင်းပဲ မျက်စေ့က ကျင့်သားရနေသည့်အတိုင်း ပထမဆုံး စီဘောက်ကို အကြည့်တချက်ဝေ့ဝဲလိုက်သည်။ ခဏတွင်းခြင်းမှာပင် ကျွန်တော့်မျက်လုံးများက ပြူးကျယ်ဝိုင်းစက် သွားသည်ဟု ခံးစားမိလိုက်၏။ အဘယ့်ကြောင့်ဆိုသော် ကျွန်တော်မပြောချင်သော အကြောင်းအရာ တစ်ခုက စီဘောက်ထဲမှာ တဂ်ခနဲ ပြုတ်ကျလာခဲ့ချေပြီကိုး။ အတောင်ပံမပါတဲ့ လူသားအမိငယ် ငှက်ငယ်လေးက မရေးရင်ရိုက်မယ် (မူကြိုဆရာမလေးများလား) တဂ်ထားတယ်။ အချစ်ဆိုသည်မှာ ဘာလဲ..? ညာလဲ..?။ သြော်..မေးရက်ပါပေ့။ လုပ်ချလိုက်ပေါ့။ တစ်နေ့ကတည်းက မပြောချင်လို့ သွားပြီးတော့ ကြိုအော်ထားပေမယ့် အလွတ်မပေးတဲ့၊ လူချင်းမတွေ့ပေမယ့် အမြဲရဲရင့်နေတယ်လို့ ထင်ရတဲ့ ကို ရဲရင့်နီ ကလည်းတဂ်။

တစ်တဂ်ပြီး နောက်တစ်တဂ်..ဟိုကလည်းတဂ်..ဒီကလည်း တဂ်။ တဂ်နဲ့တင်ကို အလုပ် တော်တော်ဖြစ်နေပြီ။ အချစ်အကြောင်းဆိုတော့ နဲနဲလောက်အချိန်ယူ ရင်ခုန်ကြည့်၊ တွေးကြည့်၊ ခံစားကြည့်ရဦးမယ်လို့ထင်တာနဲ့ တဂ်သခင်မလေးကို လာမယ်..ကြာမယ်..တက်လူငယ်လို့တော့ အရင်ဆုံး ကြိုတင်သတင်းပို့ထားခဲ့ပါပြီ။ ဒါပေမယ့် မကြာပါဘူး..အခုတင် ခေါင်းထဲမှာပေါ်လာတုန်း၊ ရင်ထဲမှာဟာနေတုန်း၊ ဘလော့ဂ်တွေလည်ရင်းကနေ တစ်ခုသောဘလော့ဂ် ကိုဖွင့်ကြည့် လိုက်မိရာမှအစပြုကာ ရင်ထဲမှာ အချစ်အကြောင်းက ပိုပြီးတော့ ခံစားလာရတယ်။ အသစ်တဖန် အချစ်ကိုပြန်နှိုးဆွ ပေးလိုက်သလိုဖြစ်လာ။ ဒါနဲ့ပဲ စာရေးချင်စိတ်က ပေါက်လာတုန်း ရေးချလိုက်ပြီ။ တစ်ခါတည်း ထိုင်ရေးလိုက်တယ်။ အချစ်ဆိုသည်မှာ...

အချစ်(၂)မျိုးရှိပါသည်-

၁။ ငါးရာနှစ်ဆယ့်ရှစ် - အနည်းအကျဉ်းမျှလောက်သာချစ် (ပုံမှန်)။ မိဘ၊ ညီအစ်ကိုမောင်နှမများစသည်တို့ကို ချစ်သော အချစ်ဖြစ်သည်။

၂။ တစ်ထောင့်ငါးရာ - မောင့်အနားမှာ (သို့မဟုတ်) မယ့်အနားမှာ ရှိသောအချစ်။ ဒီအချစ်ကို အရှင်းဆုံး အဓိပ္ပါယ်ဖွင့်ဆို ပြရရင်..သည်းခံပါ။ ရိုင်းတယ်လို့ပဲပြောပြော.. မိမိနဲ့ ဆန့်ကျင်ဘက်လိဒ် (သူ့ကိုချစ်တာပေါ့)

အချစ်ကို စာဖွဲ့ကြည့်ခြင်း

အချစ်တွေနဲ့ကင်းအောင် ဘဝမှာ နေချင်ပါတယ်..ဒါပေမယ့် ဘဝတွေနဲ့မကင်းနိုင်တာကလည်း အချစ်တွေ ဖြစ်နေပြန်တယ်။ ပန်းဆိုတာ အချိန်တန်ရင် ဖူးပြီးပွင့်လာတတ်ကြသလို..အချစ်ဆိုတာလည်း အချိန်အခါတန်ရင် ရင်ထဲကနေ ခံစားပြီး ဖြစ်ပေါ်လာတတ်ကြစမြဲပါ...။ ပန်းပင်တွေတောင် အဖူးရှိမှ အပွင့်ဖြစ်လာကြသေးတာပဲ..။ အချစ်ကြောင့် ဖြစ်လာတဲ့ ကဗျာတွေ၊ စာတွေဟာလည်း ရင်နှင့်မဆန့်လို့ ပွင့်အန်ထွက်ကျလာခဲ့တာပါ...။ နှင်းဆီပန်းလေး တွေက အဆင်းလှတယ်..၊ ရနံ့မွှေးတယ်..၊ ချစ်စရာကောင်းတဲ့ပန်းကလေးတွေပါ..။ ဒါပေမယ့် သူ့ကို ထိရင်၊ ကိုင်ရင် သတိတော့ထားပေါ့.. သူ့မှာပါတဲ့ ဆူးလေးတွေက လူကိုနာကျင်ခံစား စေတတ်လို့ပါ...။ ကိုယ်ချစ်တဲ့ သူမဟာလည်းနှင်းဆီပန်းလို အဆိပ်ရှိတဲ့သူ မဖြစ်ပါစေနဲ့...။ အချစ်စိတ်သည် သဘာဝအတိုင်း လူတစ်ယောက်ရဲ့ ရုပ်အဆင်းလှပခြင်းကို ဦးစွာ ပထမရှုမြင်ကြည့်တတ်သည်။ သူ့(သို့မဟုတ်) သူမကိုချစ်ခဲ့ စဉ်က ခဏတာအဝေးရောက်လို့ တမ်းတငေးမောဖူးမိတိုင်း မိမိချစ်သူရဲ့ရုပ်သွင် သဏ္ဍာန်ကိုသာ အစဉ် အာရုံတွင် ပုံဖော်တတ်တာ လူ့သဘာဝ။ အကယ်၍များ မိမိချစ်သူသည် တစ်စုံတစ်ခုကြောင့် ကိုယ်ကာယ ပိုင်းဆိုင်ရာ တစ်ခုခုများ ချို့ယွင်းသွားခဲ့ရင် ဘာဆက်လုပ်ကြမလဲဆိုတဲ့ အတွေးမျိုးလည်း မတွေးဝံ့တတ်ပြန် တာလည်း လူ့သဘဝ။ တွေးမိခဲ့ရင်လည်း စိတ်ထဲကနေ '' အမင်္ဂလာ '' ဟု မောင်းထုတ်တတ်ကြသည်။ အချစ်သည် ရုပ်အဆင်းသဏ္ဍာန်ကိုသာ ပိုမိုခင်မင်တတ်သည်။ အချစ်စစ်၊ အချစ်မှန်နဲ့ ဘဝတလျှောက် အနစ်နာခံ ချစ်သွားကြသူများလည်းရှိသည်။ အချစ်စစ်၊ အချစ်မှန်ကို သရုပ်ဖော်ထားသော ၀တ္တုဇာတ်လမ်း များစွာကို ဖတ်ကြည့်ရာက အချစ်အကြောင်း သဘောပေါက်လာတတ်သလို၊ အချစ်ဝတ္တုများ ဖတ်မိတဲ့ လူငယ်လူရွယ်များအဖို့ ဇာတ်လမ်းထဲက အကြောင်းအရာများကို ရင်ခုန်ကြည့်ရင်း အားကျအတုခိုးပြီး လက်တဲ့စမ်းတတ်ကြပြန်လေသည်။ အချစ်အကြောင်းကို လေးနက်စွာရေးသားနေကြသော ကဗျာဆရာ၊ စာရေးဆရာ၊ သီချင်းရေးဆရာများ သည်လည်း တချိန်က အသဲကွဲခဲ့ဖူးသူ များသည်ဟု ပြောစမှတ် ရှိခဲ့ဖူးပါသည်။ အချစ်သည် တစ်ခါတစ်ရံ စားသုံးသူကို အဆိပ်အတောက် ဖြစ်စေတတ်၏။ အချစ်ကြောင့် ဘဝပျက်တတ်သည်။ ဘဝမှာ ကောင်းသော သင်ခန်းစာ တွေလည်းရရှိသည်။ အချစ်ကြောင့် ဘဝတွေ တိုးတက် ကောင်းမွန် သွားတတ်သည်။ အချစ်သည် ခက်ခဲသော ပုဒ်စာဖြစ်တဲ့ ဘဝသင်ခန်းစာတွေကို အိမ်စာပေးသည်။ အချစ်သည် ထူးကဲသော မမြင်နိုင်တဲ့ ခွန်အားတစ်ခု။ အချစ်သည်အေးမြနေတတ်သည်။ အချစ်သည်ပူလောင်တတ်သည်။ လန်းဆန်းသည်။ ပေါ့ပါးသည်။ ပန်းတွေလို ရနံ့သင်းပျံ့ပြီး ရှုရှိုက်သူကို ကြည်လန်းဆန်းစေသည်။ ပုထုဇဉ် လူသားတိုင်းအတွက် မရှိမဖြစ်အလိုအပ် ဆုံးသော အရာတစ်ခု။ အချစ် အကြောင်းကို ဘယ်တော့မှ စာဖွဲ့လို့ မကုန်နိုင်။ ဆက်ရေးရင် တက်လူငယ် ကနေ ချစ်လူငယ် နာမည်ပြောင်းလိုက်ရလိမ့်မယ်။

အချစ်ကို ကုစားကြည့်ခြင်း

အချိန်သည် ဒီရေလို တိုက်စားတတ်သည်။ ထိုကဲ့သို့ပင် အချစ်ကိုလည်း တိုက်စားသွားတတ်ပါသည်။ အချိန်က အရာရာကို ပြောင်းလဲရင့်သန်(ရင့်မှည့်) စေတတ်ပါ၏။ ဥပမာ-မျက်စိထဲမှာ သရက်သီးရင့်မှည့်နေတာကို ပြေးမြင် ကြည့်လိုက်ပါ။ သရက်သီး တစ်လုံးမှည့်လာဖို့ရာ အချိန်ကာလအတိုင်းအတာ တစ်ခုတော့ စောင့်ရပါသည်။ ဒီလိုပဲ အချစ်တစ်ခု ရင့်သန်(ရင့်ကျက်) ပြောင်းလဲလာစေ ဖို့ရာ အချိန်ကာလအတိုင်းအတာ တစ်ခုကို မဖြစ်မနေ ကျော်လွန်ဖြတ်သန်းရသည်။ ထို့နောက် အရာရာကို အမြဲတမ်း ဝါးမြိုသွားတတ်သော အချိန်က အချစ်ကိုလည်း အလွတ်မပေးဘဲ ဝါးမြိုသွားပါလိမ့်မည်။ ဟိုတစ်ချိန်က ရှိခဲ့ဖူးသော အချစ်သည် အပြောင်းလဲကြီး ပြောင်းလဲသွားတတ်၏။ မိမိ ကျင်လည် ဖြတ်သန်းရသော ဘဝတလျှောက် အချစ်ဆိုသည့် အရာကလည်း ထပ်ကြပ်မကွာ တောက်လျှောက် လိုက်ပါကပ်ညှိတွယ်နေရင်းမှ အချိန်ကာလတွေ ကြာမြင့်လာသောအခါ လူကြီးအချစ်၊ လူငယ်အချစ်ဟူရွေ့ အခေါ်အဝေါ်တွေကွဲပြားခြားနား သွားကြလေသည်။ ငယ်ချစ်၊ နှောင်းချစ်ဆိုသည့် အချစ်သီချင်းတွေပင် ထွက်ပေါ်လာခဲ့သေး၏။ ဥပမာ - လေးဆယ်ကျော် ငါးနှစ်ထဲက (တွံ့တေးသိန်းတန်) လိုသီချင်းမျိုးတွေနားထောင်ကြည့်ပါ။ အချစ်နဲ့ ပါတ်သတ်လို့ ကတော့ ဘာပဲ ပြောပြော ပြောမဆုံးနိုင်အောင် တောသုံးတောင်မကအောင် ရှိနေပါလိမ့်မည်။ အချစ်ကြောင့် အသဲကွဲ ပြန်မဆက်နေသူများ တစ်ခါတည်းပြောလိုက်ပါမည်။ ကျွန်တော်လည်း ကွဲဖူးပါသည်။ အချစ်ရောဂါ ပျောက်အောင် အရက်သောက်ပြီးကုစားကြည့်သည်။ စီးထားတဲ့ ဖိနပ်သာပျောက်တယ်။ အချစ်ရောဂါက မပျောက်ခဲ့။ အရက်နာလည်းကျ၊ အချစ်ရောဂါလည်း ပိုထခဲ့သည်။ လူငယ်သဘာဝ မိုးသဲသဲမဲမဲရွာနေတုန်း စိတ်ကူးတွေယဉ်၊ အချစ်ရေယာဉ်ကြောမှာ မျောလွင့်ရင်း ဂစ်တာထိုင်တီးဖူးသည်။ အရက်နာကျပြီးနောက် ဖျားနာကျခဲ့ပြန်သည်။ အချိန်တွေ တဖြည်းဖြည်းနှောင်းလာတော့ အသဲကွဲတဲ့ ရောဂါကအလိုလို ပျောက်ကင်းစ ပြုခဲ့ပြန်ပေါ့။ '' နှလုံးသားကို လာပြီး အနံ့ခံကြည့်ပါ.. ကော်နံ့ရနေလိမ့်မယ်၊ ခွဲခဲ့တဲ့ အသဲ ပြန်ဆက် ထားလို့ပါ '' လို့ ပြောတဲ့ ' ရသ ' သီချင်း ထဲကလိုပဲ.. ကျွန်တော့်မှာ ကွဲထားတဲ့ အသဲကို အချိန်ဆိုတဲ့ သမားတော်က ကော်နဲ့ပြန်ဆက် ပေးထားလိုက် ပါပြီ။ ကော်နံ့လေးကတော့ အခုထိ တငွေ့ငွေ့ ရနေတုန်းပေါ့။ တသသ ပြန်လည် အောင့်မေ့ နေတတ်တုန်းပါ။ အချစ်ကို အကောင်းဆုံးကုစား သွားတဲ့ သမားတော်ဟာ အချိန်သာလျင် ဖြစ်ပါသည်။

ဆက်ဖတ်ကြည့်မယ်......

ပြန်ခေါက်ပေးရန်....

အမြင်

ဘလော့ဂါလောက

ဘလော့တွေအလယ် လျှောက်ကာလည်ပတ်
တစ်ရက်ပြီးတစ်ရက် ရက်ချင်းဆက်လည်း
ပန်းတွေမြိုင်မြိုင် ပွင့်ကြသလို
ဘလော့တွေလှိုင်လှိုင် မရိုးမကုန်နိုင်
ပေါကြပါသည် အင်တာနက်ဆီ...

တချို့ကရေး နိုင်ငံအရေး
တချို့ကမူ အချစ်ဟူသည်
တချို့ရေးပြန် ဒဿနဆန်ဆန်
တချို့ကြတော့ ဟာသပေါ့လေ

တချို့တွေ့ကြုံ ဘဝအဖုံဖုံ
တချို့တွေက ဗဟုသုတ
စုံလင်လှသည် ဘလော့ပြည်ခေါ်
အင်တာနက်ပေါ်တွင် ဘာပင်တင်တင်
လွတ်လပ်စွာပင် ဖလှယ်အမြင်တွေ

ဘလော့ကမ္ဘာမြေ လည်ပတ်နေပြီ...

ဘလော့အကြောင်း တွေးရင်းပေါင်းစပ်

ကောက်ချတစ်ခု ရေးချခုပင်
ဘယ်တော့မှမရိုး ဘလော့တန်ခိုး
လွတ်လပ်စွာတွေး လွတ်လပ်စွာရေး
အမြင်ကိုထောင်ချ အမှောင်လောက
ကျဉ်းမြောင်းမှုဆိုတာ ဘလော့ကမ္ဘာမှာ
မရှိသေးတာ အမှန်ပါ။

မှတ်ချက်။ လက်ရှိကြုံတွေ့နေရသော ယေဘူယျအမြင်အနေအထား အပေါ်မူတည်ပြီး ခြုံငုံရေးဖွဲ့ ထားခြင်း ဖြစ်ပါသည်။ အားလုံးတူညီရမည်ဟု တထစ်ကျ မဆိုလိုချင်ပါ။

ဆက်ဖတ်ကြည့်မယ်......

ပြန်ခေါက်ပေးရန်....

အကြိုက်ဆုံးများမှ ကဗျာတစ်ပုဒ် (TAG)

ခေါင်းစဉ်မေ့ကဗျာ

ကိုယ်မနှစ်ခြိုက်လို့

ပစ်လိုက်သည့်ပန်း

ကြိုက်သူနမ်းလေ

ကိုယ်ဝမ်းမနည်းတတ်ပါဘူး...။

(ကောင်းသန့်)

ဒီကဗျာတိုလေးက စာရေးဆရာကြီး ကောင်းသန့်ရဲ့ မေ့မရသောအတိတ်များ စာအုပ်ထဲမှရခဲ့တာဖြစ်ပြီး ဆရာ ကျောင်းသားဘဝတုန်းက ပထမဆုံး စရေးဖြစ်ခဲ့တဲ့ကဗျာတစ်ပုဒ်လို့ ဆိုပါတယ်။ ကဗျာခေါင်းစဉ်ကတော့ အလွတ်မမှတ်မိတော့ဘူး။ အိမ်ကထွက်လာကတည်းက ခရီးဆောင်အိတ်ထဲ ကွန်ပျူတာစာအုပ်တချို့နဲ့ ဗေဒင်စာအုပ်ကလွဲလို့ တခြားဖတ်စရာ ဘာတစ်အုပ်မှ ထည့်ယူမလာမိခဲ့တာ အကြိုက်ဆုံးကဗျာတွေက အိမ်မှာကျန်ခဲ့တာဆိုတော့ အလွတ်မမှတ်မိဘူးလေ။ ဒါနဲ့ ခေါင်းထဲမှာစွဲနေတဲ့ ကဗျာတစ်ပုဒ်က အာရုံထဲမှာ ပေါ်လာလို့ အကြိုက်ဆုံးကဗျာ တစ်ပုဒ်အဖြစ် ဘလော့မှာ တင်ပေးလိုက်ရပါတယ်။ ကျွန်တော် အနှစ်သက်ဆုံးများထဲက ကဗျာတစ်ပုဒ်လည်း ဖြစ်ပါတယ်။ နောင်တော်ဂျူဝသန်က တဂ်လို့ ပြန်ဖြေလိုက်ရပါတယ်။

ဆရာကောင်းသန့်ရဲ့ ကဗျာလေးကိုဖတ်ပြီး မှတ်မှတ်ရရပါပဲ ဒီကဗျာနဲ့ ခပ်ဆင်ဆင် ကျွန်တော်က ပြန်ပြောင်း၊ ပြောင်းပြန် လုပ်ပြီးမှ ကဗျာထပ်စပ်ထားခဲ့ပါသေးတယ်။ စပ်ထားတာတော့ (၁)နှစ်နီးပါးကြာသွားပါပြီ။ ဘလော့ စလုပ်ဖြစ်တော့ အရင်ဆုံးပိုစ့်မှာလဲ တစ်ခါဖော်ပြခဲ့ဖူးပါတယ်။

'' မလှမ်းဝံ့သူ ''

ကိုယ်နှစ်ခြိုက်လို့ ခူးလိုက်ချင်လည်း

မလှမ်းဝံ့တဲ့ ပန်းတစ်ပွင့်မို့

မမှီတဲ့ပန်း တုံးခုမလှမ်းလိုတော့ပါ...။

(တက်လူငယ်)

ဆက်တဂ်ဖို့လူတော့မရှိပါဘူး။ လောလောဆယ် တဂ်ချင်တာကတော့ လေချဉ်ပဲဗျာ။ နဲနဲများသွားလို့...(ကိုကာကိုလာ သောက်တာကိုပြောတာပါ)

ဆက်ဖတ်ကြည့်မယ်......

ပြန်ခေါက်ပေးရန်....

လွမ်းရင်ဖတ်ပါ...

ဒီဇင်ဘာမှ အလွမ်းညများ

မြောက်ပြန်လေညှင်း

တိုက်ခတ်ရင်းမှ

ချမ်းစိမ့်လာပြီ

ဆောင်းရာသီဝယ်

မြူတွေလည်းဆိုင်း

မှုံရီမှိုင်းမှိုင်း

နှင်းစက်မြေအောက်

တပေါက်ပေါက်ကျ

မြေပေါ်မှာခ

စိုစွတ်ကြသည်...

နှင်းတွေဝေပြီ

ဒီဆောင်းဆီတွင်

အလွမ်းသယ်ပြီ

ချစ်သူ့ဆီကို

အတိတ်ပန်းချီ

ဟိုဆောင်းဆီသို့

ပျံ့လွင့်ထွက်သွား

အတွေးများက
တစစမြင်

ပုံရိပ်ထင်ထင်

တသသပင်

ဆွေးတမျှင်မျှင်

ရှိနေချေပြီ

ချစ်သူ့ဆီဝယ်...

သြော်..တမ်းတရ

လွမ်းဆွေးကြတဲ့

ဒီဇင်ဘာမှ

အလွမ်းညများ။

(မှတ်ချက်။ ချမ်းအေးသော ဒီဇင်ဘာလတွင် ချစ်သူဆီသို့ အလွမ်းသယ်နေကြသူများအတွက် ခံစားရေးဖွဲ့ ထားခြင်း ဖြစ်ပါသည်။)

ဆက်ဖတ်ကြည့်မယ်......

ပြန်ခေါက်ပေးရန်....

အမုန်း(အစား) မိမိဘဝမှာ ရှိနေတဲ့ အားနည်းချက်၊ လိုအပ်ချက်နှင့် အပြစ်များ

ဘလော့ဂ်ဂါ လောကထဲကို စရောက်လာတာ မကြာသေးတဲ့ ကျွန်တော့်အဖို့မှာ Tag ခံရခြင်းဆိုတာတွေလည်း မရှိခဲ့သေးသလို Tag တယ်ဆိုတဲ့ ဝေါဟာရကိုလည်း ဘလော့ဂ် စရေးဖြစ်မှ ကြားဖူးတာပါ။ မိတ်ဆွေ တစ်ယောက်ရဲ့ ဘလော့ဂ်မှာ Tag အကြောင်း ရေးထားလို့လည်း Tag ဆိုတဲ့ ဝေါဟာရကို နားလည် သဘောပေါက် သွားပါပြီ။ Tag ခံရခြင်းနဲ့ပါတ်သတ်လို့ သင်္ကြန်မှာ တစ်ခါမှ ရေအလောင်းမခံရသေးတဲ့ အပျိုကြီးကို လူငယ်တွေက ရေလာလောင်းတာ ခံလိုက်ရသလိုမျိုးကြီးပဲ။ ရေစိုမှာကလည်း ကြောက်သေးတယ်။ ရေအလောင်းကလည်း ခံချင်တယ်။ '' အောင်မယ်..ငါ့ကိုတောင် တကူးတက ရေလာလောင်းသွားပါလား ''ဆိုပြီး မာန်တက်ချင်သလိုပဲပါဗျာ။ ရေစိုတော့ ရှိုးပျက်မယ်။ ရေလောင်း ခံရတာတော့ ပိတိဖြစ်တယ်။ ဒီလိုပဲ Tag တာ ခံရတော့ ပီတိလည်းဖြစ်သလို ကိုယ့်မကောင်းကြောင်း ပြောပြီးပြန်ရင်လည်း ကိုယ်ပဲ သိက္ခာကျဦးမယ်။ ကျပါစေတော့ဗျာ။ တကူးတက လာပြီး Tag တဲ့သူရှိမှတော့ တကူးတက ပြန်ဖြေရတော့မှာပေါ့။ ခင်မင်နေတဲ့ ဘလော့ဂ်မိတ်ဆွေတွေထဲက ညီမ ငှက်ငယ်လေး က Tag လိုက်တာပါ။

'' ကိုယ့်ကိုကိုယ် မုန်းမိတဲ့ (၁ဝ)ချက် '' တဲ့ဗျာ။ အမုန်းဆိုတာနဲ့ပါတ်သတ်လို့ အများအမြင်နဲ့ မတူဘဲ ကျွန်တော် လက်ခံယူဆ ထားတာတွေ ရှိပါတယ်။ ရှေးဦးစွာ တင်ပြပါရစေ။ အသေအချာပြန်စဉ်းစားကြည့်တော့ ကိုယ့်ကိုကိုယ် မုန်းတယ်ဆိုတဲ့ စကားကို ကျွန်တော်ကလေးကတည်းက တစ်ခါမှ မပြောမိခဲ့ဘူးဗျ။ ဘဝမှာ အလိုမကျတာတွေ ဖြစ်လာခဲ့ရင် ကိုယ့်ဘဝကိုကိုယ် နာကျည်းစွားနဲ့ '' ငါ့ဘဝက ဒီလောက်တောင် နုံချာလှချေလားကွာ၊ ဘဝပေး ကံကြမ္မာက စုတ်ပြတ်သတ်လှချေလားကွ '' ဆိုတာမျိုးလောက်တော့ အမြဲလိုလို ပြောခဲ့ဖူးပါတယ်။ တစိမ်း(သို့မဟုတ်) မိတ်ဆွေ၊ သူငယ်ချင်းဖြစ်ဖြစ် '' ငါမင်းကိုမုန်းတယ် '' ဆိုတဲ့စကားမျိုးကို လူဆယ်ယောက်ပြည့်အောင် မပြောဖူးတဲ့ ကျွန်တော်အတွက်တော့ '' ငါ့ကိုယ်ငါ မုန်းတယ် '' ဆိုတာ ယနေ့အချိန်ထိ တစ်ခါမှ မပြောဖြစ်ခဲ့ပါဘူး။ ကျွန်တော့်ကိုယ်မှာ မုန်းစရာ အကြောင်းလည်း ရှာမတွေ့သေးလို့ ပါပဲ။ တစ်ကယ်လို့သာ လူတစ်ဦးတစ်ယောက်က ကိုယ့်ကိုကိုယ် မုန်းတီးခဲ့မယ်ဆိုရင် သူဟာ ဒီလောကကြီးထဲမှာ အသက်ဆက်တည်ရှင်သန်နိုင်ဦးမှာ မဟုတ်တော့ပါဘူး။ သူ့ကိုယ်သူ သေကြောင်းကြံစည်သွားမှာ သေချာပါတယ်။

အမှန်က မုန်းခြင်းဆိုတဲ့ နေရာမှာ မိမိကိုယ်ကို အားနည်းခြင်း၊ အလိုမကျဖြစ်ခြင်း၊ အပြစ်မြင်ခြင်း ဆိုတာတွေ ကိုသာ အစားထိုး သုံးနှုံးသင့်တယ်လို့ ထင်မြင်ယူဆမိပါတယ်။ တစ်ကယ်လို့သာ ကိုယ့်ကိုကိုယ် မုန်းခြင်း (၁ဝ)ချက်မဟုတ်ဘဲ ကိုယ်မုန်းတဲ့သူကို မုန်းရခြင်း အကြောင်းအရင်း (၁ဝ)ချက် Tag လာခဲ့မယ်ဆိုရင် ကျွန်တော် ချက်ခြင်း (၁)နာရီတောင်မကြာဘူး။ ဘလော့ဂ်ပေါ်ကို အမြန်တင်နိုင်တယ်။ အခု ကိုယ့်ကိုကိုယ်ဆိုတော့ တော်တော်လေးကြာသွားတယ်။ အစကတော့ သတိမထားမိဘူး။ သူများဘလော့ဂ် တွေမှာလည်း ဒီလိုပဲ Tag ခံးထားရတာကို ပြန်ဖြေထားကြတာမျိုးတွေ ဖတ်ရတော့ သြော်..ဟုတ်ပေသားပဲ။ ကိုယ့်ကိုကိုယ် မုန်းတဲ့ဟာတွေလည်း ရှိမှာပဲပေါ့ ဆိုပြီး အလွယ်လေးစဉ်းစားမိခဲ့တယ်။ ကိုယ့်အလှည့်ကျ Tag ခံရရော သတိဝင်ပြီး ပြန်စဉ်းစားကြည့်မိတယ်။ ဟာ..မဟုတ်သေးပါဘူး၊ တစ်ခုခုတော့ လွဲနေတယ်ထင်တယ် ဆိုပြီး သိတိထားပြီး စဉ်းစားကြည့်လိုက်တော့မှ ရှင်းရှင်းကြီး သဘောပေါက်တော့တာပဲ။

Tagခံရတဲ့ မိတ်ဆွေ အများစုရဲ့ ဘလော့ဂ်မှာ ရေးထားတာတွေထဲမှာ အဓိက သတိထားမိတာ တစ်ခုရှိတယ်။ Tag ခံရပြီး စိတ်ညစ် သွားတယ်တဲ့၊ ပြီးတော့ တော်တော်စဉ်းစားပြီးမှ အချိန်ယူ ရေးပေးလိုက်ရတယ်ဆိုတာ မျိုးတွေပါ။ အဲ့ဒီ့ကတည်းက တစ်ခုတော့လွဲနေတာပေါ့ဗျာ။ ကိုယ်က စစဉ်းစား ကတည်းကိုက ကိုယ့်ကိုကိုယ် ပြန်ပြီးတော့ ဇွတ်မုန်းကြည့် နေတာကိုး၊ အသိစိတ်က မုန်းကြည့်နေပေမယ့် မသိစိတ်က လက်မခံဘူးလေ။ မိမိကိုယ်ကို မုန်းတာရှိလားလို့ မမေးဘဲ အပြစ်တွေ၊ အားနည်းချက်တွေ၊ လိုအင်မပြည့်ဝတာတွေရှိလား ဆိုပြီး ကိုယ့်အပြစ်ကိုကိုယ် ရှာကြည့်မယ်ဆိုရင် ချက်ခြင်း အဖြေရတယ်။ စာရေးဆရာမဟုတ်သော်လည်း ကျွန်တော့်ကို ဝတ္ထုတို တစ်ပုဒ် အမြန် ရေးပေးပါဆိုရင် ကြိုးစားပြီးတော့ ရေးပေးနိုင်ပါသေးတယ်။ အခုဟာက ကိုယ့်ကိုကိုယ် မုန်းဖို့ရာ တော်တော်ကြီး ခက်နေရတဲ့ အကြောင်းအရင်း တစ်ခုလိုဖြစ်သွားတာကိုး။ အတိုချုံး ပြောရရင် ကိုယ့်ကိုကိုယ် မုန်းစရာမလိုပါ။ မမုန်းသေးပါဘူး။ ကျွန်တော်မုန်းနေတာက ကျွန်တော့်ကိုယ်ကို မဟုတ်ပါဘူး။ လူလူချင်း မတရားသဖြင့် ဖိနှိပ်ချုပ်ချယ်လိုသူ၊ လူလူချင်း မတူမတန် ဆက်ဆံတဲ့ လူတန်းစား မျိုးတွေ၊ အမှန်တရားကို ဖုံးကွယ်ချင်ကြတဲ့ သူမျိုးတွေကိုသာ မုန်းပါတယ်။ လောကကို သဘာဝအတိုင်း ရှုမြင် တတ်ပြီး နှလုံးသားနဲ့ ခံစား နားလည်တတ်ကြ သူတွေကို ကျွန်တော် အရမ်းလေးစား ချစ်ခင်ပါတယ်။ ဒါတွေထားပါတော့။ ကျွန်တော် မမုန်းတဲ့ လတ်တလော ကျွန်တော့်ဘဝမှာ ဖြစ်ပေါ်နေတဲ့ အကြောင်းအချက် တွေထဲမှ အဓိက (၁ဝ)ချက်ကို အမုန်း (အစား) မိမိဘဝမှာ အားနည်းချက်၊ လိုအပ်ချက်၊ အပြစ်တွေ အဖြစ်သာ ပြောင်းလဲ ဖြေကြား ပါရစေ။

၁။ ကျွန်တော့် မိသားစုအပေါ်မှာ တာဝန်မကျေသေးလို့ ကိုယ့်ကိုကိုယ် အားမလိုအားမရ ဖြစ်ရပါတယ်။

၂။ ကျွန်တော်လုပ်ချင်တာတွေ သိပ်များနေခြင်းကြောင့် မလုပ်ဖြစ်သေးတာတွေကို အလိုမကျ ဖြစ်ရပါတယ်။

၃။ နဂိုဗီဇကိုက အေးဆေးစွာနေတတ်သော အကျင့်ကြောင့် လက်တွေ့ဘဝရှိ အချို့လုပ်ငန်းခွင် နေရာများတွင် ကိုယ်နဲ့ အလုပ်က ဆန့်ကျင့်ဘက်လို ဖြစ်နေတတ်သဖြင့်လည်း လက်ရှိအလုပ်ကို ဘဝင်မကျဖြစ်ရပါတယ်။

၎။ လူတစ်ယောက်ကို သဘောရိုးနှင့် အဦးဆုံး ရှုမြင်တတ်သော မိမိ အကျင့်ကြောင့် ခဏခဏ လူလိမ်ခံရ ဖူးသဖြင့် မိမိကိုယ်ကို သတိမထားရကောင်းလားဆိုပြီး အားနည်းချက်တစ်ခုအဖြစ် အပြစ်မြင်မိပါတယ်။

၅။ သာမန်အချိန်မှာ လူအေးတစ်ယောက်လို နေတတ်သော်လည်း ကိုယ်နဲ့ စိတ်သဘောထားခြင်း မတိုက်ဆိုင်လို့ဖြစ်စေ၊ ကိုယ့်ကို အပြစ်တင်ရှုတ်ချလာလို့ဖြစ်စေ အဲ့ဒီ့လူကို မခံချင်အောင် ပြန်ပြောတတ်သော၊ စိန်ခေါ်ဝံ့သော မိမိအကျင့်ကြောင့်လည်း ခဏခဏ ပြသနာတတ်ခဲ့ဖူးသဖြင့် ထိုအကျင့်ကို ကောင်းကောင်း မဖျောက်ဖျက်နိုင်သေးသော မိမိကိုယ်ကိုလည်း အပြစ်ရှိနေသည်ဟု ထင်မြင်မိပါသည်။

၆။ ပုလင်းကွဲရှရင် ခဏလောက်သာ နာကျင်တတ်သော်လည်း အသဲကွဲရှရင် အကြီးအကျယ် နာကျင်ခံစား တတ်သောကြောင့် မိမိနှလုံးသားကိုလည်း အားနည်းချက်တစ်ခုအဖြစ် အပြစ်မြင်မိပါတယ်။

၇။ အချိန်ကို ကောင်းစွာ စီမံခန့်ခွဲတတ်တဲ့ အလေ့အထ မရှိခဲ့သဖြင့် ဘဝမှာ ဆုံးရှုံးခဲ့ရတာတွေ၊ လက်လွတ်ခဲ့ရတာတွေ၊ ခေတ်သစ်မှာ နောက်ကောက်ကျ ကျန်ရစ်ခဲ့တာတွေ များခဲ့သဖြင့်လည်း အချိန်ကို လေးစားဖို့ လိုအပ်သေးတယ်လို့ ထင်မြင်မိပါတယ်။

၈။ ကျွန်တော့် အပေါင်းအသင်း၊ ရောင်းရင်းများနှင့် ရံဖန်ရံခါ ကြုံရင်ကြုံသလို ပျော်ပါး သောက်စားတတ်ခြင်း၊ လက်ထဲမှာ ရှိတဲ့ငွေကို အတိုင်းအဆမရှိ လက်လွတ်စပယ် သုံးစွဲတတ်သော မိမိအကျင့်ကြောင့် ခဏခဏ ဒုက္ခရောက်ဖူးသဖြင့် ထိုအကျင့်ကိုလည်း ပြုပြင်ပြောင်းလဲရန် လိုအပ်ပါသေးသည်။

၉။ အစွဲအလန်းကြီးကြီး ထားတတ်သော မိမိ အကျင့်ကိုလည်း အားနည်းချက်တစ်ခု အဖြစ် ထိမြင်မိပါသည်။

၁ဝ။ ဘလော့ဂ်ဂါရောဂါကို အခုမှ စတင်ခံစားရဖူးသဖြင့် ဘလော့ဂ်ပိုး မသတ်နိုင်သေးသော မိမိကိုယ်ကိုလည်း အပြစ်တင်မိပါသည်။

ဒီလောက်ပါပဲဗျာ။ ကျွန်တော့်ဆက် Tag ဖို့လူကတော့ မရှိပါဘူး။

မှတ်ချက်။ အထက်ပါ(၁ဝ)ချက်မှာ လတ်တလောဘဝရဲ့ ထင်မြင်ယူဆချက်တွေသာ ဖြစ်ပါသည်။ နောင်အခါ ပြောင်းလဲကောင်း ပြောင်းလဲသွားနိုင်ပါသည်။ (၁ဝ)ချက်ထက်ပိုပြီး အဓိက ပြောချင်နေတာတစ်ခု ကျန်နေပါသေးသည်။ လတ်တလော သာသနာပြု ရဟန်းခံလိုစိတ်က အရမ်းပြင်းပြနေသော်လည်း လက်ရှိဘဝ အနေအထားမှာ ဘယ်လိုမှ မဖြစ်နိုင်သောကြောင့် လက်မှိုင်ချကာ ထားရပါသည်။

ဆက်ဖတ်ကြည့်မယ်......

ပြန်ခေါက်ပေးရန်....

အဝေးရောက် ကိုရွှေမြန်မာများအတွက် ကဗျာလက်ဆောင်

ပြန်ချင်နေပြီ မြန်မာပြည်ဆီ

ချစ်သူ့မျက်နှာ
လပြည့်ဝင်းသာ
ပမာပုံဆောင်
ရှုချင့်ယောင်ဖွယ်
စွဲစွဲလန်းလန်း
အသဲပန်းလောက်
မြတ်နိုးခဲ့သည်
ချစ်မဒီရေ...

တစစဖြင့်
ချစ်သူနှင့်ကိုယ်
ကံရယ်အကြောင်း
မဆုံပေါင်းဖို့
သူဖန်တီးထား
ကြမ္မာများလား
တစ်ခဏတာ
တစ်ဘဝစာလား
အတိအကျ
သိမရတဲ့
ဒီဘဝမှာ

တို့ခွဲခွာကာ
ဝေးခဲ့ရပြီ
ချစ်မဒီရေ...

ရေမြေတွေခြား
တိုင်းတပါးသို့
ရောက်ခဲ့ချိန်တိုင်
မမေ့နိုင်တဲ့
ဟိုရင်အတိတ်
အချစ်စိတ်က
တစိမ့်စိမ့်ပင်
တိုးကာဝင်လာ
နှလုံးသားမှာ
တွယ်တွယ်တာတာ
ချိန်ခါမလပ်
တလှပ်လှပ်ဖြင့်
တုန်ရီနေသည်
အသဲအိမ်ဆီ...

ရှေ့ရေးတွေးခေါ်
ကြိုတင်မျှော်ကာ
သာယာပျော်ရေး
ဘဝရေးတွက်
အလုပ်တွေကို
အချိန်ပိုဖြင့်
ကြိုးကြိုးစားစား
မနေနားဘဲ
ဆောင်ရွက်ခဲ့သည်
ချစ်မဒီရေ..

တမိုးကုန်ပြီ
တဆောင်းဆီရောက်
တနွေပေါက်ကာ
တမိုးလာပြန်
ဒီမိုးလည်းကုန်
နောင်ကဆုန်သို့
တစ်နှစ်ကူးပြောင်း
တန်ခူးနှောင်းမှ
ရက်တွေလည်းဟောင်း
ရာသီပြောင်းလဲ
တဖျတ်ဖျတ်လူး
ရော်ရွက်နူးတွေ
မြေမှာဝဲခ
ပျံဝဲကျချိန်
ပြန်ချင်နေပြီ
မြန်မာပြည်ဆီ။

(မှတ်ချက်။ မိမိဘဝခံစားချက်များမဟုတ်ဘဲ အဝေးရောက် ကိုရွှေမြန်မာများအတွက် ရည်ရွယ်ပြီး ခံစား သရုပ်ဖော် ရေးဖွဲ့ထားခြင်း ဖြစ်ပါသည်။)

ဆက်ဖတ်ကြည့်မယ်......

ပြန်ခေါက်ပေးရန်....